By Rey Anthony Chiu/PIA-Bohol | 10:07 PM August 04, 2021

Sugod sa Agosto 6 ngadto sa Agosto 20, sirad-an na usab sa Bohol ang iyang mga ganghaan sa mga mosulod sa lalawigan.

Kini aron paghatag og kahigayonan sa lalawigan sa pagkontrolar sa kadaghanon sa mga nangatakdan na dinhi, ug sa pagpangandam sa posible nga pagsulod nganhi sa gikahadlokang delta variant sa Coronavirus disease (Covid-19).

PInaagi sa Executive Order No. 37 series of 2021 nga gipagawas ni Gobernador Arthur Yap niadtong Agosto 2, ang duha ka semana nga pagpanira sa pultahan sa lalawigan sa mga buot mosulod nganhi, mahitabo usa ka tuig ug kapin sa upat ka buwan human una nga nanira ang Bohol sa mga mosulod nganhi niadtong Marso 16, 2020, tungod gihapon sa hulga sa Covid.

Kini usab matud pa sa gobernador, iyang gipauyon sa pagtabon sa kinatibuk-ang Metro Manila sa Enhanced Community Quarantine (ECQ) subay sa rekomendasyon sa nasudnong Inter-Agency task Force for the management of Emerging Infectious Diseases (IATF).

Sa Bohol, sugod sa mga nahisgutan nga mga adlaw, gawas lamang sa domestic nga paghatud sa kargamento pinaagi sa eroplano ug barko, gawas sa Authorized Persons Outside Residences, wala nay lain pang makasulod pa sa Bohol sa natumbok nga duha ka semana.

Hinuon, subay sa labing bag-ong mandu sa gobernador, magpadayon pa gihapon nga mnakasulod ang mga health workers nga may opisyal nga katuyu-an, gitugotan nga mga opisyal sa kagamhanan, kadtong mobyahe tungod kay magpatambal o kadtong may humanitarian reason.

Makasulod pa usab nganhi bisan sa pagsira, ang mga Overseas Filipino Workers nga mamauli, mga tawo nga nagtanyag sa batakang serbisyo ug kadtong anaa sa public utilities sama sa tubig ug suga, ug kadtong mga taga bangko, aron magpuno sa pundo nga kwarta ug mga kagamitan sa mga bangko aron magpadayun ang serbisyo niini.

Sa mga mosulod nga mga APOR, kinahanglan gihapon nila ang negatibo nga resulta sa RT-PCR test, Saliva PCR nga gikuha 72 ka oras sa dili pa moluwan sa sakyanan patabok sa Bohol.

Pagtamak sa APOR sa Bohol, adto lamang siya tugotan nga mopundo sa lugar diin siya may tuyo, dili mahimong makig-sawo sa ubang tawo gawas lamang sa tawo nga iyang tuyo sa pagtabok.

Adto lamang siya mouli sa iyang tumbok nga quarantine hotel o sa LGU Temporary Treatment ug Monitoring Facility (TTMF) sa lanat sa iyang pagtabok.

Hinuon, kon molapas siya sa lima ka adlaw dinhi, ipailawon siya sa RT PCR testing sa iyang ika lima ka adlaw ug magpabiling magpundo sa quarantine facility hangtud nga mogawas na ang iyang negatibong RTPCR test result.

Matud usad sa EO, makagawas lamang siya og makasuroy sa ubang lugar sa Bohol kon mag negatibo na ang resulta sa iyang RT PCR nga kuhaon sulod sa ia lima niya nga adlaw pag-abut nganhi.

Sa mga OFWs, kinahanglan sila magpakwarantina sa lima ka adlaw didto sa us aka hotel nga giaccredit sa Department of Tourism o sa LGU TTMF, diin magpaabut sa ilang lain pang RT PCR human sa lima nila ka adlaw sa pasilidad. Makagawas lamang sila kon magnegatibo na sa COVID sa ilang RT PCR test nga kuhaon sa ikalima nila ka adlaw nga kwarantina. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.