By Rey Anthony Chiu/PIA-Bohol | 11:17 AM June 18, 2021
Ang dili makontrolar nga pag-abut sa bakuna nga magamit, maoy numero uno nga hinungdan nga wala pa makabuylo ang Bohol sa pagpanghatag sa panalipod batok sa coronavirus disease (Covid-19).
Tulo ka buwan human sa unang pagtupok sa bakuna dinhi sa Bohol niadtong Marso 6, anaa pa sa 72, 446 ang bakuna nga natupok: 50,582 ang natupokan sa unang dose, samtang 21,846 pa lamang ang nakakompleto na sa duha ka doses.
Kini maoy gibutyag ni Bohol Inter Agency Task Force on the Management of Emerging Infectious Diseases (BIATF) spokesperson Dr. Cesar Tomas Lopez, atul sa labing bag-ong Kapihan sa PIA.
Dugang ni Dr. Lopez, kinsa maoy acting Provincial Health Officer karon sa Bohol, nga ang matag gitukod nga vaccination center sa Bohol, makaya nila nga alagaran ang 150 ka tawo sa usa ka adlaw nga pagpangbakuna.
Apan, dugang niya, kini nagdepende sa suplay sa bakuna nga magamit, kasinati-an nga namatikdan usab sa ubang mga lugar.
Hinuon, gibutyag sa doctor nga nahimong kanhi bokal sa lalawigan nga milaum ang BIATF nga mas mapadaghan pa ang mga maalagaran sa bakuna sa Bohol, karon nga may nangabut na usab nga lab-as nga suplay sa bakuna.
Gitaho niya nga human sa kapin na sa tulo ka buwan human nasugdan ang pagpangbakuna, medyo hanas na ug kabisado na ang mga vaccination teams sa kalungsuran sa angayan nga buhaton, mao nga mahimong mas paspas na sila sa ilang buhat.
Gikataho na nga may 11,700 ka doses sa bakuna nga Pfizer ang nahidangat sa Bohol niadtong Hunyo 16, ug sanglit kini nga bakuna, nanginahanglan man sa ultra-cold freezer, gidawat kini sa refrigerated freezer sa usa ka pribadong companya sa Bohol; ug gihatud ngadto sa syudad sa Tagbilaran, kinsa nakapalit sa nga daan sa ultra-cold temperature freezer para katipigan sa mga sensitibong mga bakuna.
Ang bakuna sa Pfizer, nagkinahanglan nga tipigan sa -60 ngadto sa -80 degrees farenheit, nga dili makaya sa normal nga mga freezer, matud ni Dr. Lopez
Sa laing bahin, nahidangat na usab ang 5,000 ka doses sa bakuna nga Sputnik nga hinimo sa Gamaleya Institute sa Russia.
Nahidangat usab ang 17,000 ka doses sa Sinovac dungan niini nga delivery, segun sa taho.
Kini nga bakuna, matud poa ni Dr Lopez, lakip sa gipasalig sa Department of Tourism nga ipanghatag sa mga anaa na frontline tourism services, aron hinayhinay na nga ipahiuli ang kompyansa sa mga turista kon moanhi sa Bohol.
Didto sa Tourism Forum nga gitambongan ni DOT secretary Bernadette Puyat, gipadayag ang laraw sa DOT nga pasugdan dinhi sa Bohol pinaagi sa 5,000 ka mga bakuna nga Sputnik ang pagpalig-on sa mga lumimihok sa turismo.
Kini kabahin na sa laraw sa kagamhanan nga una ug hinay-hinay nga ipahibalik ang lagsik nga turismo sa Bohol ug kini mahitabo lamang kon mosalig na ang mga turista nga dili matakdan sa sakit kay kompleto na sa bakuna ang mga frontliners sa industriya. (rahchiu/PIA-7/Bohol)
