By Rey Anthony Chiu/PIA-Bohol | 11:25 AM June 18, 2021
Nag-una pa gihapon ang Tagbilaran dihang napun-an og 13 ka bag-ong aktibong kaso sa coronavirus disease (Covid) ang natala segun sa Bohol Inter Agency Task Force, June 17.
Gikan sa 228 ka aktibong kaso, anaa na sa 241 ang kaso sa Tagbilaran City karon, bisan pa sa pinaspas nga pagpangbakuna ang gihimo sa syudad.
Ikaduha na usab ang Dauis, nga may 63 ka kaso sa Covid gahapon, apan nadugangan og 9 ka kaso, ngadto na sa 72 ka aktibong kaso.
Ang Candijay nga kanhi anaa sa ikaduhang pwesto Hunyo 16, mikanaug og usa ka ang-ang sa ikatulo sa ilang 68 na ka kaso sa Covid.
Gikan sa 49, ika upat pa gihapon ang Sierra Bullones sa 55 ka kaso dihang laing 6 ka residente ang nagpositibo sa kagaw human sa testing.
Ikalima na usab ang Calape nga may 48 na ka kaso karon, gikan sa 46 gahapon.
Ang Alicia maoy anaa sa ika unom nga pwesto sa may labing daghang kaso sa Covid, dihang natumbok nga may 38 sila ka kaso ug walay bag-ong kaso nga namatikdan sa lungsod Hunyo 17.
Ikapito ang Tubigon karon, nga sama sa nahauna nga adlaw, naa pa gihapon ang 37 ka kaso didto.
Sa ika walo nga lugar, nagtabla ang Cortes ug Antequera nga pareho nga may 36 ka kaso.
Ang Cortes daan na nga nag 36 niadto pang Hunyo 17 samtang gikan sa 34, napun-an og duha ang kaso sa Antequera.
Tabla pa gihapon ang Catigbian ug Valencia nga parehas nga may gitaho nga 34 ka kaso, walay bag-ong kaso Hunyo 17.
Ika napulo pa gihapon ang Corella nga may 33 ka kaso; usa ang nadugang gikan sa 32 nga natalang kaso niadtong Hunyo 16.
Niini, pahimangno ni Dr. Cesar Tomas Lopez ang acting Provincial Health Officer, dili gyud nato talikdan ang pagsul-ob sa face mask, face shield, pagpanghunaw kanunay ug ang paglikay una sa tapoktapok, ilabi na gayud kon wala pa mabakunahi ug walay tukmang panalipod sa lawas.
Kini, matud pa niya, kay napruwebahan nga nga labing epektibo nga panalipud sa mga wala pa mabakunahi.
Gi-awhag usab sa kanhi Bokal ug mayor sa Loon, nga dili gyud sipyaton ang pagpabakuna ug nani kon mahimo, magpalista isip apil sa Quick Substitution List (QSL) aron mahimo nga una nga matawgan sa higayon nga ang mga nalista sa masterlist, mapakyas sa pagpatim-aw sa panahon sa tingbakuna na. (rahchiu/PIA-7/Bohol)
