By Rey Anthony Chiu, PIA-Bohol | 08:49 PM April 26, 2021

Bisan sa nagsapong nga kaso sa corona virus disease sa Bohol kagahapong adlawa, adunay medyo maayong talimad-on nga nakita.

Kini tungod kay, sa 330 ka mga swab samples nga gipadala ug giproseso alang sa confirmation sa Covid -19 positivity, 24 lamang niini ang migawas nga positibo, segun sa gipakita nga Covid-19 report sa Bohol Inter-Agency task Force for the management of Emerging Infectious Diseases.

Sa tinamban nga pagkasulti, sa kadaghanon sa giproseso nga samples gikan sa mga tawo nga gidudahan nga natakdan sa nasampit nga sakit, 7 lamang sa matag 100 ka tawo ang naghambin na sa nahisgutan nga sakit.

Sa nahisgutan usab nga adlaw, ang 24 nga bag-ong kaso nga nadugang, mipasulbong pa sa kadaghanon sa mga natakdan ngadto na sa 678, ug diin 651 niini pulos nakakuha sa sakit kay natakdan sa ilang paggawas sa balay dinhi na sa Bohol.

Ang duolan sa 97 sa matag usa ka gatus nga may sakit sa COVID (96.90%) kini igo na unta nga magpadayag sa kakuyaw sa pagpanakod-takod nga nia na sa silinganan.

Unta, kini nga datus magpahayag sa kamatuoran nga ang paggawas sa usa ka tawo sa iyang panimalay, us aka dako nga hagit ngadto sa kagaw nga motakboy kaniya aron iyang madala sa balay ug matakdan usab ang iyang mga sakop, dayag pa sa mga tinugyanan sa kasanihan nga mipahugot sa ilang kampanya sa pagpabalik sa personal nga pagpili sa pagpuyo una sa balay.

Mogawas lamang kon dunay importante nga panginahanglanon, apan dili usab mopalta sa pagsul-ob sa face mask sa sakto nga paagi, pagsul-ob sa sakta usab nga face shield, sa paglikay nga makaduol pag-ayo sa daghang mga tawo ug sa pagbansay sa tukmang pamaagi sa sakto nga pag-ubo ug pagpanghatsi, dugnag pahimangno sa mga tinugyanan.

Dinhi sa Bohol, sa nahisgutan nga kadaghanon, ang pagkapakyas sa kadaghanan sa pagtamud sa minimum health ug safety protocols, naka-angin na usab sa 34 ka mga health care workers nga nangatakdan samtang gikinahanglan unta ang ilang mag serbisyo niining higayon sa kalisud.

Ang 34 ka mga HCWs, 13 niini ang nagakigan sa Tagbikaran, 4 sa Dauis, 3 sa Duero, 2 sa Talibon, 2 sa Loon ug tag-usa ka buok sa Trinidad, San Isidro, Candijay, Lila, Loboc, Ubay, Loay, Calape, San Miguel ug Getafe.

Niining adlawa, ang labing daghang nga ihap sa COVID, nia sa Tagbilaran diin may 218 ka residente, 32 ka mga piniriso ug lain nga 32 ka mga nagtrabaho sa call centers dinhi.

Sunod sa Tagbilaran ang Dauis nga may 32 ka kaso: 28 ka residente ug 4 ka HCW.

Sunod sa Dauis na ang Lila nga may 29 ka kaso: 28 ka residente ug usa ka HCW samtang ang Tubigon og Baclayon parehas nga may 28 ka kaso sa COVID sa ilang mga residente.

Naas a ika unom ang Cortes nga may 17 ka kaso sa ilang mga residente samtang nagsunod ang Balilihan ug Maribojoc nga may 17 ka mga kaso.

Parehas usab nga may tag 14 ka kaso ang Danao, Sierra Bullones ug Valencia. (rahchiu/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.