By Rey Anthony Chiu, PIA-Bohol | 11:49 AM November 30, 2020
Sa ikatulo ka sunod-sunod nga adlaw, nagsige na nga may daghang bag-ong kaso sa coronavirus disease (Covid-19) ang mamatikdan sa Bohol.
Hangtud sa alas 4:00 sa hapon, Nobyembre 29, 2020, segun sa Covid-19 Case Map nga gipagawas sa Bohol Inter Agency Task Force on the management of Emerging Infectious Disease, 21 ang labing bag-o nga mga Bol-anon nga natakdan ug kompirmado nga may COVID.
Ang kadaghanon sa mga nakompirmado nga may COVID sa tibuok lalawigan sa Bohol nianang adlawa, ming sapong na sa 112 ka kaso.
Ang nakaparat pa gyud niini, sa 21 ka mga bag-ong kompirmado nga kaso, 14 niini ang mga natakdan gikan sa mga nagdala na sa sakit dinhi, o mas giila nga local nga transmission.
Kana lamang nagpasabut nga may daku nga posibilidad nga may nakagawas na nga nagdala sa kagaw nga way kalibutan nga nagsige na sila og panakod.
Niadtong Nobyembre 28, adlaw nga Sabado, may natala usab nga 16 ka bag-ong kompirmado nga kaso sa COVID sa Bohol, ang 16 tanan pulos mga nangatakdan nga dinhi na ang tinubdan sa sakit.
Nianang adlawa usab, mingsapong sa 91 ang kinatibuk-ang kaso sa COVID nga nakompirmar sa mga tinugyanan.
Niadtong Nobyembre 27, sa 88 ka mga kompirmado nga kaso sa COVID-19 sa Bohol, naha-ugpot ang mga Bol-anon sa balita nga ming-sulbong ngadto sa 52 ang bag-ong mga kaso sa Bohol.
Sa 52 ka mga bag-ong nakompirmar nga kaso niadtong adlawa, 15 niini ang local nga pagpanakod, labing daghan niini, walo ka kaso dinhi sa syudad sa Tagbilaran.
Niadtong Nobyembre 26, 2020, ang kinatibuk-ang kaso sa Bohol miabut sa 42 ug 10 lamang niini ang giingon nga local transmission.
Ang sa Nobyembre 25, nalipay na pag-ayo ang mga tinugyanan kay abi na nila nga pagpadayon na gayud ang pagpa-ubos sa mga kaso sa COVID sa Bohol, kay mikanaug na kini sa 28 ka kinatibuk-ang kaso sa nakompirmar nga may sakit.
Gani, niining adlawa, 4 na lang ang natakdan pinaagi sa local nga pagtakod.
Subay niini, gawas nga mas labing importante karon ang pagpuyo na lang usa sa balay samtang kamolo pa ang mga tinugyanan og pangita aning mga tawhana nga nagpakanit sa sakit, mas makatabang kon likayan una ang mga pagadto sa mga lugar nga may mga positibong kaso sa local transmission.
(rahchiu/PIA-7/Bohol)