May kaso nga pagpanglugos, nadakpan nga sakop sa NPA

By Rey Anthony Chiu, PIA-Bohol | 01:00 AM July 03, 2020

Wala’y epekto ang gi-ingon nga balaod sa mga New People’s Army, ngadto sa ilang nagkakunhod nga mga sakop, mao nga bisan pa og criminal, basta magamit sa ilang niluog nga katuyu-an, pwede.

Kini maoy mingtumaw nga kamatuoran dihang didto sa mop-up operations sa kasundalohan sa 47 Infantry Battalion human nila gikabagat sa sinukli-ay sa bala ang pipila ka armado nga sakop sa NPAs, may nasikop silang usa ka gikatahapan’g tawo.

Kahinumduman nga gitaho sa mga residente sa Bayawahan ngadto sa mga tinugyanan ang bahan sa mga armado nga tawo nga nanghadlok gamit ang ilang armas ug pagka NPA aron makakuha’g pagkaon.

Niadtong Hunyo 27, usa ka adlaw na human ang enkwentro, sa may mga alas 3 sa palis, may usa ka sibilyan nga wa hiilhi sa lugar ang gikataho nga wala magsul-ob og mask didto duol pa sa lugar nga nahitabo ang sinukliay sa bala.

Una nga nga giduol sa mga tinugyanan ang gikadudahan nga tawo sanglit kini wala magmask, dili taga didto ug nagsul-ob og tshirt sa army.

Giili sa mga tinugyanan ang gikatahapan nga us aka Crisologo Guimaras, alyas Sam, 21-anyos nga residente sa Barangay Bingag, Dauis, Bohol.

Sa dugang pagpakisusi, namatikdan nga ang gikatahapan, may gitago-an nga Improvised Explosive Device (IED) ug usa ka rifle grenade.

Sa tactical investigation sa mga kasundalohan, miangkon si Guimaras nga apil siya sa bahan sa mga NPA nga gikabagat sa mga kasundalohan sa milabay nga adlaw.

Dugang saysay ni Guimaras nga dugay na siya nga regular nga sakop sa NPA ubos sa pagpangulo ni Domingo Compoc alyas Kumander Cobra.

Sa wala pa mosulod sa pagka NPA, si Guimaras diay, may wala itug-an nga tulo ka kaso sa pagpanglugos ubos sa docket case numbers 17654, 17655 ug 17656 niadto pang Hunyo 25, 2015, nga gipagawas ni President Judge Leo Moises Lison, sa Regional Trial Court Branch 3 sa Tagbilaran City.

Matud pa ni Guimaras, milayas siya sa Luzon aron dili matanggong sa bilangguan niadto pang 2015.

Niadtong 2018, miuli sia dinhi ug sa kahadlok sa kasong atubangon, misulod sa kalihukang walhon nga gipalig-on didto sa mga hilit nga dapit sa lungsod sa Inabanga.

Karon nga nadakpan, ipatong sa tulo ka kaso nga pagpanglugos ang lain nga mga kaso: kalapasan sa RA 9516 o ang illegal nga paghupot sa Explosives, samtang gikustodya siya sa Bohol Provincial Police Office.

Segun pa sa mga tigpamaba sa 47IB, kining sitwasyona ni Guimaras, napakita nga nga ang mga bahan sa komunista nga terorista maayo lang mopatuo nga ilang ikapatuman ang hustisya ngadto sa nilupigan, apan ilang gigakos ug gipanalipdan pa ang criminal nga nanglugos.

Ang insidente naga pakita nga ang CTGs dili lamang manglingla sa mga inosente apan mangkuha usab sa mga criminal, nga buot moikyas sa kamut sa balaod.

Ilang giapas, bahalag gipangita sa balaod nga mga criminal, basta daghan lang sila nga tan-awon ug mapalapad ang ilang walhong katuyuan, segun pa ni Lieutenant Elma Remonde-Arbulencia, Civil Military Operations Officer sa 47 IB. (rahchiu/PIA-7/Bohol)

Leave a Reply

Discover more from BOHOL ISLAND NEWS

Subscribe now to keep reading and get access to the full archive.

Continue reading