By Rey Anthony Chiu, PIA-Bohol | 05:54 PM May 05, 2020
Gihupay ni Provincial Inter Agency Task Force on emerging and Infectious Diseases Spokesperson ang kahingawa sa mga katawhan nga matud pa, nakasakay sa bus nga maoy gisakyan sa mga nangabut nga Overseas Filipino Workers (OFWs) gikan sa Manila.
Sa usa ka pagpakighinabi sa radio, gibutyag ni Dr. Cesar Tomas Lopez nga tinuod nga usa ka bus sa usa ka kumpanya ang gipasakyan sa 48 ka mga OFWs nga nahidangat sa pantalan sa Tagbilaran niadtong Abril 28.
Apan, pahayag ni Dr Lopez, kaduha nga gi-agi og dis-infection ang bus human mingkawas ang mga OFWs didto sa usa ka hotel sa Tagbilaran City, diin sila temporaryo nga gipailawom sa kwarantina sa ilang pag-abut nganhi.
Nagkaguliyang na usab ang social media dihang may daghan nga nag post nga ang bus nga gisakyan sa mga OFWs, mingbyahe ug namasahero sa pagka-ugma.
Gani, may local nga tinugyanan sa ilang Facebook account ang nagpasubay na sa contact tracing sa mga kawo nga posibleng nakasakay sa bus nianang pagka ugma, Abril 29.
Eksakto usab nga gipalanug sa social media nga may pipila ka mga OFWs ang namatikdan nga may sip-on ug ubo sa ilang pag-abut dinhi.
Ang sip-on, ubo ug hilanat maoy tataw nga mga simtomas nga ang usa ka tawo mahimong natakdan na sa kagaw sa makamatay nga coronavirus disease (COVID).
Niini usab, gipasabut ni Dr Lopez nga ang 48 ka mga OFWs gikuhaan na usab og swab samples aron ikapadala alang sa pagtesting sa mga laboratoryo aron ilhon ang presensya sa kagaw nga mananakod.
May gikataho nga nagpositibo sa kagaw, apan kini dali lamang usab nga gihimakak sa mga tinugyanan tungod sa dili kini conclusive segun pa usab sa mga taho.
Matud ni Lopez, ang bus, human mikanaug ang mga OFWs gikan sa pantalan, giagi og disinfection sa mga tinugyanan sa Bureau of Fire Protection.
Dugang niya, aron maseguro, lain nga disinfection usab ang gihimo sa mga tinugyanan sa Provincial Health Office, aron paghimo nga redundant sa proseso ug pagseguro nga walay kagaw, kon aduna man galing OFW nga nahimong nagdala sa kagaw, ang mabuhi sa sakyanan.
Tungod niini, gipasalig ni Dr. Lopez nga ang Bohol padayon pa gihapon nga naningkamot nga walay makasulod nga COVID dinhi, bisan pa nga gisaway ang mga tinugyanan sa kagamhanan sa ilang pagpalubad sa Oplan Exodus.
Sukad niadtong katapusang semana sa Abril, 67 na ka OFWs nga nanguli ang gidawat sa Bohol ug gipailawom sa pugos nga kwarantina, bisan pa man nga kining mga tawhanan nakahuman na sa 14 ka adlaw nga kwarantina nga gitutokan sa Department of Health.
Sa mga nangabut nga mga OFWs, 48 niini ang milawig gikan sa Manila, usa ka hot zone sa COVID ug sa Sugbo, nga kasamtangan pang nakigbugno sa COVID-19.
