By Rey Anthony Chiu, PIA-Bohol | 11:56 PM April 17, 2020
Otorisado nga Police Non-Commissioned Officer sa kagamhanan nga nagbitbit sa sertipikasyon ug quarantine clearance subay sa gilatid sa Executive Order No. 8-A.
Siya karon ang tinubdan sa kahingawa sa mga nakadungog sa baylo-ay sa hunahuna sa radio kabahin sa usa ka tawo nga ingon pa, nakalusot, sakay sa usa ka barko nga mingdunggo sa Catagbacan Loon gikan sa Argao Cebu, niadto pang unang semana sa Abril.
Kini nga kasayuran ang nakuha gikan sa Philippine Coast Guard (PCG), taliwala sa wala na kapugngi nga tuyok sa mga pangagpas ug panahum nga gisumsuman usab social media, human nahimong pabilo sa radio ang maong hitabo.
Segun sa dokumento nga gipaambit sa PCG, ang unod sa gisumsuman nga estorya usa ka patrolman sa kapulisan, nga may gihuptan nga Certification ug Quarantine Clearance gikan sa Philippine National Police.
Kahinumduman nga niadtong Marso 14, gipirmahan ni Gob Arthur Yap ang Executive Order No. 8-A nga nagpaamendar sa item one sa Executive Order No. 8 nga nagdeklara usab sa 5 ka adlaw nga pagsira sa Bohol ug sa pagpatuman sa mga lakang aron tubagon ang nagpadayon nga hulga sa coronavirus disease (COVID-19).
Ang Item No 1 sa EO 8 nga gipirmahan sa gobernador sa Marso 13, 2020, nagsaysay nga ang Domestic ug International nga air ug sea travel sa mga pasahero nga nagpa-ingon sa Bohol, gawas sa domestic air ug sea travel sa kargamento, suspendido na sugod sa 12:01 sa Lunes, Marso 16 ug kini magpabilin hangtud sa sunod nga lima ka adlaw, gawas kon una nga ilibkas.
Apan sa pagkasunod adlaw, Marso 14, gipalusot na usab sa gobernador ang Executive Order 8-A nga nagpadayag sa panginahanglan nhga magbutang og pipila ka exception sa pagpasulod sa mga pasahero sa lalawigan sa Bohol, samtang nagpadayon ang kwarantina.
Ubos sa Item 1 sa EO 8-A gibutang na sa amended EO ang mga tawo nga dili na iapil sa pagdili sa pagsulod sa Bohol.
Lakip sa mga dili maapil sa pagpugong, sumala sa EO 8-A mao ang mga health workers, otorisado nga opisyal sa kagamhanan, kadtong mobyahe sa rason nga medical ug humanitarian, ug kadtong mga personahe sa mga bangko kinsa mo-anhi sa Bohol aron magpuno sa mga cash funds ug uban nga panginahanglan sa way bugto nga serbisyo sa mga bangko sa ilang depositor.
Segun pa sa Certification, kini nagbutyag nga ang nahisgutan nga pulis gihatagan na sa Quarantine/Clearance Pass nga makatabok nagdto sa Tagbilaran City Bohol gikan sa Argao/ Cebu CIty sa bisan unsang higayon kon anaa nay barko nga kaluwanan sa nahisgutang personahe ngadto sa Bohol, subay usab sa mga regulasyon administratibo, balaod o ordinansa nga gipatuman.
Niini, ang gipasulod, usa ka pulis nga naapil sa otorisado sa kagamhanan, dala na usab sa iyang gibitbit nga Certification or Quarantine Clearance gikan sa Kampo Dagohoy, saysay sa PCG Bohol.
WRITER’S NOTE: Wala na ibutang ang mga pangalan sa mga hingtungdan, kay, isip usa ka writer, mitamud kita sa dokrina sa pagpanalipud sa ilang pagkatawo. Hangtud mahukman sa usa ka competent nga korte nga illegal ang ilang gibuhat, sa mandu sa Korte, kana, mapugos na kita nga ibutyag ang ilang matuod nga mga identity. Salamat sa pagsabut, (RAHCH)
