By Rey Anthony Chiu, PIA-Bohol | 12:03 AM April 18, 2020
Sa kasamtangan, unom pa lamang ka lungsod sa Bohol ang nakadawat sa pundo alang sa pagpatuman sa Social Amelioration Program (SAP) sa kagamhanan sabay sa Emergency Subsidy program sa kagamhanan nga nasukip sa Bayanihan to Heal as One Act.
Kini segun pa ni Department of Social Welfare and Development (DSWD) Bohol Social Welfare and Development (SWAD) Team Administrative Assistant Marlon Banico, sa pagpakighinabi sa Philippine Information Agency (PIA).
Kini nga mga kalungsuran mao ang Ubay, Carmen, Tubigon, Clarin, Balilihan ug San Isidro.
Dugang sa DSWD, kining unom maoy lakip sa labing una nga mga lungsod nga nakakompleto sa mga dokumentos nga gikinahanglan sa DSWD aron ika download usab sa kalungsuran ang pundo nga ilang gikinahanglan nga ipang-apud-apod isip SAP.
Ang uban nga lungsod, nauwahi na sa pagduso sa ilang mga dokumento, nga unta adto pang duha na ka semana ang milabay gipangayo, segun sa DSWD Bohol SWAD Office.
Dugang pa, daghan usab nga LGUs nga mingduso sa ilang mga dokumentos apan daghan ang sayop, kuwang sa rekisitos ug may mga suliran pa, hinungdan nga wala na makarga sa unang mga dokumento nga plastada na nga giduso sa SWAD Bohol ngadto sa DSWD Regional Field Office.
Didto sa unang semana nga Kapihan sa PIA, gisaysay ni Bohol SWAD team leader Rhea Marie Tubongbanua, nga ang DSWD mangita sa sa Memorandum of Agreement (MOA) nga pirmado sa mayor nga magpadayag nga ang lungsod mo-apil sa programa.
Ikaduha niini, aron legal ang paglagda sa Mayor sa MOA sa DSWD, kinahanglang usab mapakita sa lungsod ang usa ka resolusyon sa Sangguniang Bayan nga nagtugot sa mayor nga makalagda sa MOA sa DSWD alang sa SAP.
Ikatulo niini, kinahanglan usab nga iduso sa LGU ang Project Proposal kabahin sa SAP, aron mahibaw-an sa DSWD ang kadak-on sa pundo nga ihagbong ngadto sa LGU.
Ikaupat niini, kinahanglan nga maduso sa lungsod ngadto sa DSWD SWAD ang Social Amelioration Program Cards, nga una na nga gipang-fill-upan sa tanan nga mga amahan sa panimalay sa tanang barangay sa lungsod.
Kining upat ka mga dokumento, adto iduso sa DSWD SWAD Office sa Tagbilaran sa dili pa kini ipasa sa SWAD ngadto sa DSWD Regional Field Office.
Matud sa ni Bohol SWAD Team Admin Assistant Banico, ang DSWD Regional Office, human nila madawat ang mga dokumentos, motan-aw niini ug kon wala nay suliran,
modownload na sa pundo segun sa nakarga sa SAP Project Proposal sa lungsod, ug kini nga pundo idownload sulod sa 24 oras.
Human madawat sa lungsod ang maong pundo, segun pa sa DSWD, lima lamang ka adlaw ang gitagal alang sa LGU aron ilang ikapanghatag ang SAP ngadto sa mga tumbok nga benepisaryo niini.
Dugang sa DSWD, sulod sa 15 ka adlaw mahuman kini ikapanghatag sa mga labing kabus ug ubos ang kita, mohimo na gilayon ug mahuman na sa LGU ang pagliquidate sa pundo.
