By Rey Anthony Chiu, PIA-Bohol |11:33 PM April 01, 2020
Mihangyo ang Department of Trade and Industry (DTI) Bohol nagdto sa mga namaligya ug sa mga mamalitay o konsumidor nga kon mangompra, kadtong gikinahanglan lamang sulod sa pito ka adlaw labing daghan.
Sa usa ka Notice to Retailers nga gipagawas niadtong miagi nga semana, ang DTI Bohol pinaagi ni Provincial Director Maria Soledad Balistoy mipasabut nga ang ilang hangyo, subay sa interes nga naa gyud gihapoy mapalit ang uban nga gikinahanglan ug may supply sa nag-unang panginahanglan ilabi na karon nga nasulod na kita sa State of Public Health Emergency.
The Department of Trade strongly encourages all retailers to sell and all consumers to buy such products in such quantities sufficient as to meet their needs only for a maximum of seven days, segun sa Notice.
Matud sa DTI, pinaagi niini, makubsan ang kahadlok nga adunay artipisyal nga kakuwang sa supply, magpaundang na sad ang panic-buying ug magpugong na sa pagtago og daghang supply aron inig mag nihit na, ikabaligya sa mas mahal nga presyo.
Gisugyot usab sa ahensya nga maoy natahasan sa pagdumala sa patigayon nga alang sa mga retailers, nga ilang inaton ug dumalahon og maayo ang ilang stocks inventory aron kaalagaran ang labing baga nga konsumidor.
Kini usab samtang padayon pa nga gilansang ang presyo sa mga nagauna nga paliton human ikadelara sa Presidente ang State of Pulic Health Emergency.
Gani, aron usab pagtabang sa DTI sa pagbantay nga walay bisan usa nga mosakay sa higayon ug magparesyo og maayo sa iyang baligya, mihagit na usab ang National Bureau of Investigation (NBI) nga mosumbong nagdto kanila ang mga konsumidor nga may namatikdang nagpaginansya.
Usab, ang pipila ka ahensya sa kagamhanan, gitutok na usab sa ilang atensyon ngadto sa online sellers, kinsa namaligya nga wala nay bayranay pa sa buhis, sa mga supply nga labing gikinahanglan niining panahun sa kalisud.
Hinuon, wala pay nataho nga nadakpan dinhi sa Bohol nga negosyante niining panahon sa kalamidad nga misakay sa panahon ug nagpaginansya.
Ang ato gayud nga tumong, mao nga kapanalipdan ang konsumidor samtang katabangan usab ang mga negosyante sa ilang mga paningkamot, panapos sa DTI. (rahchiu/PIA-7/Bohol)
