By Rey Anthony Chiu, PIA-Bohol | 11:40 PM April 01, 2020
Ang Development Bank of the Philippines (DBP) mipadayag nga andam sila nga motabang pinaagi sa pahuwam ngadto sa mga negosyo ug local government units (LGUs) nga apektado sa kwarantinas nga gipatuman sa nasudnong kagamhanan aron kubsan ang pagkatag sa corona virus disease (COVID-19) dinhi sa nasud, pahayag sa usa ka opisyal sa nasampit nga bangko.
Matud sa Presidente sa DBP ug Chief Executive Officer nga si Emmanuel G. Herbosa, ang ilang Rehabilitation Support Program on Severe Events (DBP RESPONSE) makatanyag og financing support alang sa pagpahiuli sa public ug private institutions, nga mahimong apektado sa katalagman, sama sa labing bag-o nga hulga sa panglawas nga gitawag og COVID-19.
“Ang DBP andam nga motanyag sa funding assistance ngadto sa mga negosyo ug LGUs samtang sila naningkamot nga makabangon gikan sa pagkahagsa dala sa hulga sa COVID-19,” matud ni Herbosa.
Human gipagawas ni Presidente Duterte ang Proclamation No. 929, nga nagbukot sa tibuok nasud sa State of Calamity o State of Public Health Emergency dala sa nagsulbong nga kaso sa COVID-19, mingkabat na sa kapin sa usa ka libo ka tawo ang nataho nga positibo sa kagaw.
Ang DBP, nga mao ang ika walo nga labing dako nga bangko sa nasud subay sa kabtangan niini, nagtanyag og pautang sa upat ka nga dagkong sektor nga nagtuboy sa kaugmaran sa nasud: ang imprastraktura ug logistics, micro, small ug medium enterprises, social services ug community development, ug ang kalikopan.
Ilawom sa DBP RESPONSE, ang mga pribadong institusyon lakip na ang mga pamuhunan, korporasyon, kooperatiba, kapunongan, tunghaan, ospital ug mga financial institutions mahimo nga mopailawom sa programa, matud ni Herbosa.
Dugang niya nga ang mga LGUs, government corporations sama sa nagdumala sa tubig pangbalay (utilities sama sa water districts), lakip na ang state universities ug colleges mahimo usab nga moapil sa programa.
“Ang programa nagtanyag og mas taas nga panahon nga mobayad sa huwam: kini mahimong moabut sa 15 ka tuig, lakip na ang 3 ka tuig nga grace period ug concessional rates aron matabangan ang mga minghuwam nga makapahiuli sa epekto sa kalamidad nga dala sa COVID-19.”.
Kadtong buot mopailawom sa proyekto ug manghuwam, kinahanglan nga moduso sa usa ka proyekto nga mahimong pundohan sa bangko; kini nga proyekto kinahanglang may epekto sa kinatibuk-an nga kaugmaran sa komunidad nga giserbisyohan, matud sa DBP.
Kadtong interesado sa pahuwam, mahimong makigsabut na sa labing duol nga DBP Lending Center sa ilang lugar aron mahibaw-an ang dugang mga mekanismo sa programang pahuwam.
Mahimo usab nga makisayud gikan sa DBP website: http://www.dbp.ph.
