By Rey Anthony Chiu/PIA-Bohol | 09:1AM February 27, 2020
Buhi nga kasinati-an sa pagtuo: kini maoy nalantaw sa simbahan nga anggulo samtang nakighiusa kini sa pagpalig-on sa industriya sa turismo nga na-uyog sa coronavirus (COVID 19).
Kini usab maoy gipaambit ni Rev. Fr. Valentino Pinlac, kinsa maoy gitugyanan ni Bishop Alberto Uy sa paghipno sa Visita Iglesia: usa ka matang sa tour subay sa konsepto sa prigrimahe diin ang mga turista mohimo sa mga pag-ampo ug pagpamati sa mga kasayuran ilabi na sa buhing pagtuo nga nalimin sa mga karaang simbahan sa Bohol.
“Niining panahon nga nagsingabut ang Semana Santa, bout usab nato nga bisan sa epekto sa international tourism, makahimo kita sa atong local og nasudnong kampanya, pinaagi sa pagsuroy sa mga karaang simbahan, pag-ampo ug pagsuhid sa mga kasinati-an sa katawhan kansang pagtuo nabuhi niini,” matud ni Fr. Pinlac.
Niadtong mi-agi nga mga adlaw, gilibut sa Visita Iglesia Technical Working Group (TWG) ang mga karaan nga simbahan sa Jagna, Valencia, Loay, Albur, Cortes, Tubigon ug Calape alang niini nga katuyu-an.
Kauban sa TWG nga misubay sa mga simbahan uban ni Fr. Pinlac mao ang Bohol Tourism Office, Investment Promotion Center, Philippine Information Agency, Center for Culture and Arts Development, mga tour guides, mga manunuwat, bloggers, ug tour agents nga sakop sa Bohol Federation of Travel and Tour Operators (BOFETTO).
Matud ni Fr Pinlac, kinahanglan sa mga nasampit nga tours ang igo nga kahibaw kabahin sa pagtuo nga Katoliko, ang kasaysayan sa mga simbahan, katesismo ug ang mga tradisyon sa simbahan aron mas mapasabut ang simbahan sa kinabuhi sa katawhan sa komunidad.
Dugang sa pari nga gitugyanan sa Diyosesis sa paghipno sa Visita Iglesia tours, kini nga laraw sa simbahan, haum usab sa pangandoy sa Lalawigan sa Bohol nga magdugang pa sa pagtabang sa mga kabus, pagpa-ugmad sa ekonomiya subay sa malungtaron nga turismo ug kalikopan ug ang pagbuhi sa Bol-anon nga kina-iya nga karon nameligro na nga hingkalimtan.
Kahinumduman nga diha nay una nga Visita Iglesia, apan kini mas daghan ang suroy ug kasaysayan sa mga simbahan kay sa pag-ampo ug pagsaksi ug pagsinati sa buhing pagtuo nga simbahan ug sa tinuohan nga nagpalig-on sa mga komunidad nga Bol-anon, sa pagbarug batuk sa hulga sa kinabuhi.
