By Rey Anthony Chiu/PIA-Bohol | 09:45 AM February 27, 2020
Nangayo og dispensa samtang mipahibaw ang Department of Public Works and Highways (DPWH) First Engineering District Office (DEO-1) ngadto sa mga sumasakay ug mga nagmaneho og sakyanan nga moagi sa dalan paingon sa Corella gikan sa Tagbilaran dala sa kahasol nga nasinati hangtud mahuman ang pagtrabaho niini.
Kini samtang si District Engineer Francis Antonio Flores, sa iyang hangyo sa pagpahibaw niining kasayuran, mibutyag nga ang dalan subay sa JA Clarin sugod sa Simbahan sa San Isidro Labrador paingon sa utlanan sa Tagbilaran City ug Corella, magpatuman man gihapon sa two-way traffic, apan mangandam sa panagsang paghuot sa dagan sa trapiko.
Matud Ni DEO Flores, may nakuha sang District Office nga pundo ilawom sa ilang regular infra sa 2020 General Appropriations Act (GAA) alang sa .954 metros nga pagpasemento sa aspaltado nga nasudnong dalan gikan sa natumbok nga simbahan sa San Isidro paingon sa utlanansa Corella.
Kini gikan sa simbahan sa San Isidro nagdto sa unahan og dyutay sa eskina sa San Isidro Elementary School ug sa duol sa Tompar’s Grill nagdto na sa unahan sa Petron Gas Station, sa utlanan na sa Corella.
Dugang sa DPWH, ang mga kalihukan nga nalangkob sa construction naglakip sa paglangkat sa aspalto ug mga estraktura nga nakababag, pagkubkob, pagpatag ug pahiluna sa subgrade, pagpahimutang sa .28 metros nga semento nga walay kabilya sulod sa 14 ka adlaw u gang pagpahimutang sa thermoplastic pavement markings.
Dala sa mga natumbok nga mga kalihukan, masinati gayud ang temporary nga kahasul sa dagan sa trapiko subay sa Tagb-Corella-Sikatuna-Loboc gikan sa kilometrahe 5 ngadto sa kilometrahe 5.325 ug sa kilometrahe 6 ngadto sa kilometrahe 6.29.
Tungod niini, dyutay nga dispensa ang gihangyo sa DPWH sa mga sumasakay ug mga nagsakyanan nga apektado sa pagtrabaho.