By Rey Anthony Chiu/PIA-Bohol | 01:03 AM January 21, 2020
Mga pulis sa Anda Police Station.

Nag-una ang Anda Police Station sa tanang estasyonan sa kapolisan sa nakuha nga rating sa pagsolbad sa mga krimen nga gipasaka sa ilang buhatan.

Segun sa taho didto sa Provincial Peace and Order Council (PPOC) nga nagtigum didto sa new Capitol niadtong Enero 16, gitaho sa Operations Chief nga si Senior Police Major Norman Nuez, nga ang Anda Police Station mipuntos og 87 porsyento sa ilang crimes solution efficiency (CSE).

Ang CSE nagpasabut nga sa 100 nga kaso sa krimen nga giimbestigaran sa usa ka police station, 87 niini ang nasolbad.

Ang pagkasolbad sa kaso naga pasabut nga ang kapolisan sa nahisgutan nga lugar, nakatumbok na sa suspitsadong criminal, naka-andam na sa tukmang kaso nga isang-at sa korte ug napasakaan na gani sa kaso.

Bisan pa og wala pa kini mapriso kay wala pa kahukmi sa mga korte, solbad na kini alang sa mga kapolisan, pasabut sa Kampo Dagohoy.

Sunod sa Anda mao ang Valencia Police Station nga nakakuha og 85 porsyento sa pagsolbad sa mga kaso nga ilang gi-imbestigaran.

Sundo usab nila ang Pilar (83 porsyento), Mabini (82 porsyento) ug Sevilla (80 porsyento).

Kahinumduman usab nga naidtong susama nga PPOC, gitaho sa Kampo Dagohoy nga nagkadaghan ang kaso sa krimen sa Bohol.

Matud ni Police major Nuez, kinsa maoy operations Branch Head sa Campo Dagohoy, natala ang 28.93 porsyento nga umento sa gidaghanon sa mga kaso sa 2019 kon itandi sa milabay nga tuig.

Apan, gikan sa ubos kayo nga 48.60 porsyento nga crime solution efficiency sa 2018, napasaka kini sa mga kapolisan sa Bohol ngadto na sa 52.40 porsyento.

Sa laing bahin, ang mga estasyonan sa kapolisan nga may labing ubos nga kadaghanon sa kaso nga nasolbad mao ang Danao Police Station nga gikataho’ng may 23 porsyento lamang sa matag us aka gatus ka kaso ang nasolbad.

Sunod sa Danao mao ang Loay Police Station nga may 33 porsyento nga kaso ang nasolbad.

Ang nahasunod mao ang mga estasyonan sa kapolisan sa Jagna, Batuan ug Loboc nga may natala nga 35 porsyento lamang ka kaso ang nasolbad.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: