By Rey Anthony Chiu/PIA-Bohol | 12:13 AM December 18, 2019
Mayor John Geesnell “Baba” Yap II. Photo: Mayor Baba Yap FB

Tukoron sa syudad sa sunod nga tuig, ubos ni Mayor John “Baba” Geesnell Yap II, ang labing una ug labing dako nga sports center dinhi, ang Tagbilaran City Coliseum.

Kini maoy gipaambit sa Mayor sa syudad nga naa na sa katapusan nga hunat sa iyang ikatulo nga termino, didto sa Media Christmas Party sa Tagbilaran, nga nahitabo didto sa Cafe Dolores, Bohol Tropics Resort Disyembre 17.

Ang natumbok nga sports center nga dinhi mismo ipabarug sa Tagbilaran may kapasidad nga mopalingkod sa 6000 ka manan-away ug may igo nga kaparkingan sa 2000 ka sakyanan.

Una na nga obserbasyon sa mga nagdumala karon sa kagamhanan ang kakuwang sa nasampit nga pasilidad, ilabi na nga ang Bohol giisip na nga usa sa mga lalawigan nga gihimong sumbanan sa kadaghanan nga lalawigan.

Gani, ang gipasigarbo nga sports complex sa Bohol nga gipangalan sa Bol-anon nga presidente, layo ra sa mga sports centers sa mga silingan nga syudad ug lalawigan.

Ang laraw sa syudad nga magtukod og sentro sa paugnat sa kusog, subay usab sa programa sa syudad sa pag-ugmad sa sports ug sa paghulma sa mga kabatan-onan ngadto sa mabungahon nga mga kalihukan.

Namatikdan nga ang suporta sa kagamhanan sa syudad nga nadawat sa mga manuwaay sa Tagbilaran, maoy usa sa mga hinungdan nga mingsulbong ang Dibisyon sa syudad sa Central Visayas Regional Athletic Association sa talaan sa mga sumasalmot.

Matud ni Mayor Yap, kang kinsa nga pagdumala giadornohan usab sa mga pasidungog, nga ang labing una nga coliseum sa syudad, kaluhaan usab sa Capitolyo.

Butyag sa mayor, interesado usab si Gob. Arthur Yap nga magtukod sa susama nga sports center ang Bohol apan kini didto ibutang sa lain nga lugar ug gawas sa Tagbilaran.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.