By Rey Anthony Chiu/PIA-Bohol | 12:16 PM November 13, 2019

Taliwala sa hulga sa African Swine Fever (ASF) ug sa nagpadayon nga pagpugong sa pagpasulod sa mga karne ug buhi nga baboy lakip na ang mga giproseso nga karne gikan sa Luzon paingon sa Bohol, aduna pa gihapoy mapalit nga hamon para sa Pasko.

Kini maoy gibutyag sa Department of Trade and Industry (DTI) pinaagi ni Undersecretary for consumer protection group Usec Ruth Castelo, sa iyang pagsubay sa mga presyo sa mga nag-unang paliton dinhi.

Matud ni Usec Castelo, dili hinuon ingon kaniadto sa wala pay hulga sa ASF nga daghan ang kapili-an sa hamon nga paborito sa mga Pinoy sa Pasko, apan aduna pa gihapoy mapalit nga hamon sa mga malls sa Bohol.

Ang hamon, usa sa mga produkto nga gidid-an sa pagsulod sa Bohol ilabi na gayud kon kini naggagikan sa Luzon diin may gikataho nga mga lalawigan nga ang pangbabuyan apektado na sa gika-intapan nga sakit.

Una nga gikataho nga nakaapekto sa mga babuyan sa Rizal ug Bulacan, ang ASF nga dili man makadaut sa tawo, may kapasidad kini nga mopuo sa kantibuk-an nga pangbabuyan sa nasud.

Gikompirmar na usab sa Department of Agriculture ang pagkatakod sa mga baboy sa ASF didto sa Cavite, Pangasinan, Pampanga, Quezon City, Manila ug Rizal.

Ug sanglit nagkanit na ang mga lalawigan diin namatikdan ang pagtakod sa ASF, lisud na nga mapaseguro nga luwas ang mga baboy ug karne gikan sa Luzon nga makasulod sa Bohol.

Kahinumduman usab nga wala pay kasaligan nga tinubdan sa Bohol sa mga giproseo nga pagkaon, ilabi na sa hamon nga pang pasko.

Kasagaran nga supply sa Bohol sa hamon, gikan sa Luzon ug kadtong mga imported nga mahimong gikan usab sa mga nasud nga una na nga gidid-an sa pagpasulod sa ilang produkto sa Bohol.

Kini bisan pa nga ang mga hamon, kasagaran nga una na nga gi-andam sa pagproseso bisan pa nga wala pa masinati ang hulga sa ASF sa nasud.

Hinuon, sa pagsusi ni Usec Castelo sa mga malls sa Bohol kon napatuman ba ang suggested retail price (SRP) segun sa balaod, namatikdan niini, nga gawas nga may mga produkto sa noche buena nga mas ubos pa sa SRP, namatikdan usab nga may usa pa ka produkto nga mapalit sa mga hamon nga luwas sa ASF, alang sa pamasko.

USA KA HAMON. Giisip nga dako nga hagit sa mga namuhi og baboy ang pagpaseguro nga walay ASF nga makasulod dire sa Bohol, bisan pa kon kini nagpasabut nga kunhod ang hamon ug mahimong magnihit kini hangtud motaas ang presyo. Hinuon, mipasalig ang DTI nga ila kining bantayan. Dinhi, si Usec Ruth Castelo misusi sa hamon de bola, uban kang DTI Bohol Marisol Balistoy ug mga tinugyanan sa DTI Consumer Protection Group. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.