By Rey Anthony Chiu/PIA-Bohol| 09:37 PM October 29, 2019

Wala pa ideklara sa Malacanang ang Oktubre 31 nga holiday.

Kini agi og tubag sa mga pangutana kabahin sa kon ang 31, wala bay trabaho.

Kahinumduman nga sa mga nanglabay nga panahon, diha nay mga higayon nga ang Oktubre 31, gideklara nga walay trabaho aron kahatagan ang baga nga duot sa katawhan sa kahigayunan nga makapauli sa ilang mga probinsya aron makatanda sa ilang mga minahal sa kinabuhi sa mga sementeryo.

Kahinumduman usab nga si Presidente Rodrigo Duterte, pinaagi sa Proclamation No. 555, mingdeklara na sa Nobyembre 1, 2019, Biyenes, isip holiday kay kini Adlaw sa mga Santos.

Pinaagi usab sa sama nga Proclamation, gideklara na usab ang Nobyembre 2 isip additional special non-working holiday, uban sa Disyembre 24.

Ang Nobyembre 2, giisip nga Adlaw sa mga Kalag.

Hinuon, ang Nobyembre 2, 2019, natunong sa adlaw nga Sabado ug mao nga kadaghanan sa mga tawo niining adlawa, namahuway sa week-end.

Apan, sama sa nanglabay na nga mga katuigan, diha nay mga higayon nga ang Oktubre 31, gideklara nga walay trabaho, ug gani, may gahum ang presidente sa pagdeklara sa dugang nga mga holidays.

Sa milabay nga tuig, wala ideklara sa Malakanyang ang Oktubre 31, apan sa pagka-udto, gipasuspenso na usab niini ang trabaho sa mga kawani sa kagamhanan, aron mahatagan sila sa kahigayunan sa pagbyahe pauli sa ilang mga lalawigan.

Bisan pa niini, sa milabay na nga mga tuig, namahayag ang mga tinugyanan sa Palasyo nga naa ra sa mga tag-iya ug tagdumala sa mga pribado nga kompanya kon ilang hatagan ang ilang mga trabahante sa lugway sa pagbyahe sa nahisgutan nga adlaw.

Sa laing bahin, sanglit ang Nobyembre 4, giila na nga Carlos P. Garcia Day, wala na usab trabaho alang sa mga Bol-anon.

Ang CPG Day, nga usa na ka special non-working public holiday gideklara aron kahatagan ang mga Bol-anon sa higayon nga saulogon ug handumon ang adlaw nga natawhan ni Carlos P. Garcia, ang ika upat nga presidente sa Republika sa Pilipinas ug ang unang president sa 1971 Constitutional Convention.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.