By Rey Anthony Chiu, PIA-Bohol / 7:39 PM October 16, 2019
Saksihan sa mga taga Baclayon ang paglusad sa usa ka bahan nga nangandoy nga maka-abag sa mga may suliran sa tumang kasubo nga kasagaran makahunahuna og paghunos sa hinuwaman nga kinabuhi.
Ilusad ang PAGhatag og PAgkapabana sa Kabililhon sa kinaBUHI (Pagpakabuhi) dungan usab sa opisyal nga pagsubo sa center niini didto sa Baclayon, Bohol karong Domingo, Oktubre 20 sa sayo nga buntag.
Matud ni Dr Fruserma Mary Uy, convenor sa Pagpakabuhi, hamubo nga pagtapok sa panalangin ang magbukas sa adlaw sa paglusad ug human sa pagpabalaan sa buhatan ug sentro sa mga kalihukan sa bahan, motambong ang mga sakop niini sa santos nga misa nga pangunahan mismo ni Bohol bishop Alberto Uy, didto sa simbahan sa Baclayon.
Kini samtang padayon nga nagkadaku ang mga miboluntaryo sa ‘Pagpakabuhi’ human usab daghan ang mipagawas sa ilang kasibut dala sa nagkadaghan nga kaso sa paghunos sa kinabuhi dala sa dili na ma-daug pa nga mga suliran ug kasamok sa panghunahuna.
Segun pa sa mga pagtuon, alang sa mga tawo nga may gihambin nga suliran ug kakutaw sa utok, o tumang kasubo, ang presensya sa usa ka tawo nga andam maminaw, dako na og ikatampo alang niini.
Ang tumang kasubo, o depression usa ka pagkadaut sa buot nga maoy hinungdan sa permi nga kaguol ug ka wala’y interes sa daghang butang.
Usahay giila nga clinical depression, kining tumang kasubo maka-angin sa pagbati sa tawo, sa iyang panglihoklihok, panghunahuna ug usahay maoy magtulak niini sa mas daghan pa nga emosyonal ug pisikal nga suliran sama sa pagpasakit sa kaugalingon ngadto na sa paghunos sa kinabuhi.
Niini, kon walay makatabang, kining may gibati nga ingon niini, magkaproblema sa normal nga inadlaw nga paglihoklihok ug usahay mobat nga wala nay pulos ang pagpakabuhi.
Segun pa usab sa mga batid, ang depression dili kahuyang sa usa ka tawo, nani, dili usab kini matambalan diha diha.
Apan, uban sa therapy sama sa pag- -angkon nga may gibati nga tumang kasubo, angay usab sa us aka tawo nga masabtan ang iyang gibati, ug niini, makatabang kadtong tawo nga andam maminaw.
“Usahay, dili na kinahanglan pa nga gradwado o may kurso sa psychology aron motabang sa gimbuhaton sa pag-agak sa mga may depression,” matud ni Dr. Uy.
“Yano nga presensya, pagpamati, pag-unong ug pagtabang sa pag-ampo ang labing maayong tampo sa mga buot mobuluntaryo alang sa Pagpakabuhi,” dugang ni Dr Uy, kinsa maoy focal person sa mental wellness and health.
Alang sa buot motambong sa paglusad, magsugod ang kalihukan sa alas 5 sa buntag sa sawang sa Baclayon.
