By Rey Anthony Chiu | 12:45 PM August 10, 2022

Tulo ka mga simbahan sa Bohol ang natudlo karon nga may kalambigitang espirituhaon sa usaka daku nga basilica sa Roma, ug tungod niini, ang pagsulod sa mga balaang pultahan ug pagsimba niining mga local nga simbahan, makuha na ang mga grasya nga sama ra sa ming-adto sa Roma. 

Ang pagsulod ug pagsimba sa mga simbahan nga gipasidungog usab kang Santa Maria dinhi sa Bohol sama sa Simbahan sa Birhen sa Asuncion sa Dauis, Simbahan sa Birhen sa Kasilak sa Loon, ug Simbahan sa Birhen sa Guadalupe sa Loboc, makahatag sa mga mosulod niini sa grasya sa pagpasaylo sa sala nga tanan, pagkalikay sa silot sa impyerno ug pagdawat sa mga grasya. 

Kini human itugyan sa Basilica Maria Maggiori, ang “spiritual affinity” sa mga nahisgutang simbahan nga may makuhang susamang grasya ug indulhensya ang mga mosulod ug mosimba sa mga local nga simbahan sama sa kasinati-an kon personal nga mosulod sa basilica sa Roma. 

Ang Basilica Maria Maggiore ang labing daku nga simbahan sa Roma nga gipahinungod kang Santa Maria, usa sa upat ka labing dagkong basilica sa Roma nga may napahimutang nga misahan sa Santo Papa, ug usa sa pito ka mga dagkong simbahan nga nahilakip sa ruta sa mga pilgrimahe sa Balaang Yuta. 

Sa kapilya sa sulod sa Basilica Maria Maggiore Makita ang gitahod nga imahen sa Birhen Maria nga giisip nga tigpanalipod sa katawhan sa Roma (Salus populi Romani).

Sa ilawom sa high altar niining basilica makit-an ang langub nga gitipigan sa mga handumanan sa pagkatawo sa bata nga Hesus diin tua didto ang bildo nga may tipaka sa balaan nga kona sa batang Hesus. 

Sa laing bahin, ang simbahan sa Birhen del Asuncion sa Dauis may milagrosong birhen sa iyang altar ug may tubod sa tubig tab-ang nga anaa sa ilawom sa iyang altar. 

Ang simbahan sa Dauis usa sa mga simbahan nga dili pakyason sa mga Bol-anon nga mopanaw ngadto sa laing lugar, aron mangayo sa giya ug panalipod samtang tua sa paglangyaw. 

Ang Simbahan sa Birhen sa Kasilak, una nga giyukbuan sa mga parokyano sa Butuan, apan gilawig aron makalikay sa pag-asdang sa mga pirate. Sa paglawig, nidagsa ang imahen uban sa mga naghiklin niini sa isla sa  Sandingan ug ngadto na sa Napo, diin mainiton kining gidawat ug gihangop sa mga taga didto. 

Napahimutang sa bag-ong naayo nga simbahan, ang milagrosong Birhen, mipakita nga nagbarug ibabaw sa Inang-angan diha nga may hulga na usab sa pagsulong sa mga pirate. Ang sanag nga dagway ug biste maoy nakapalisang sa mga Moros, hinungdan sa ilang pagkagiw, ug naluwas ang katilingban sa pag-asdang. 

Sa laing bahin, ang Simbahan sa Birhen sa Guadalupe Extremadura, nahimutang sa ikaduha nga labing karaan nga simbahan sa Bohol. 

Kini maoy nag-inusarang representasyon sa Birhen sa Guadalupe nga wala ibutang sa istampa, nani, nagkugos og bata, ug nahi-apil sa mga gipangitang koleksyon sa “black madonnas.” 

Ang Birhen sa Guadalupe sa Loboc gibantug sa iyang kamilagroso, nga sa tanang higayon nga mo-apaw ang suba sa Loboc, dalhon ang imahen  sa Birhen sa tampi sa suba ug dayon mokalma ang tubig paingon sa pagkahubas. 

Niini karon, naglaum ang mga nagpadagan sa kalihukan sa turismo sa Bohol nga mahimong lain na usab kini nga ruta alang sa turismo sa pagtuo. 

Kini samtang ang Bohol naningkamot nga makasakay sa kahigayunan nga makabarug og balik gikans a pagkalup-og sa pandemya ug sa sunodsunod nga mga katalagman nga nagpalisud sa ekonomiya. (rahc/PIA-7/Bohol) 

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: