By: Rey Anthony Chiu/PIA-Bohol| 03:25 PM September 10, 2019
Alang sa mga mahiligon sa lumba sa bisekleta tadlas sa mga lisud nga agi-anan, nia na usab ang lumba sa 35 kilometros nga gipasalig nga lingaw, nindtot ug makapagilok sa tiil nga lumba sa cross country, nga nagpasabut nga may parte nga mga karsada ang agi-an ug may dalan-dalan ra usab.
Sa pagpahatag og kalingawan sa nagsingabut nga pista, itanyag sa Municipality of Clarin ang 1st Clarin Open Invitational Extra Challenge Mountain Bike Race nga bukas alang sa tanang mountain bike enthusiasts lukop kalibutan.
Ang lumba nga mahitabo sa Septembre 22, bukas alang sa edad nga 29 anyos paubos, 30 ngadto sa 49 anyos, 50 anyos pataas ug sa Elite category.
Ang lumba, may registration nga P200.00, magbukas lamang sa adlaw sa lumba sa mga alas 6:00 sa buntag.
Alas 8:00 usab sa buntag giingon nga magsugod pagbuhi sa mga kategorya nga moapil sa lumba.
Segun pa sa Municipal Sports Committee Chair ug Sangguniang Kabataan uban sa Clarin Bikers Adventure Team (CBAT), mapa-abut sa unang lima ka mga mananaug sa matag kategorya ang premyo nga salapi ug tropeyo ug sertifiko nga ihatag human sa duwa.
Kini nga lumba hinuon, dili magtugot sa substitute rider sa nakarehistro, ug walay tugotan nga moduwa nga wala marehistro, wala makapirma sa waiver ug wala matan-aw sa medical team ang presyon sa dugo.
Dili usab tugotan ang mo-salmot sa lumba nga dili kompleto ang iyang bike gear ug uniporme, mogamit sa mga bisekleta nga dili mountain bike ug walay nakuha nga race number.
Ang ruta sa lumba magsugod sa Clarin Cultural Center, subay sa highway paingon sa Nahawan, saka ngadto sa Cantuyoc, moadto sa Caboy, Mataub, Tuntonan, Villaflor, Bugtongbod, Cabog, Tubod, Danahaw, Buangan, Candajec, Katipunan, buacao ug balik sa Cultural Center.
Alang sa dugang kasayuran ug sa mga schedules sa trackread nga may guides, tawag o text ni Floro Tunday sa mobile number 09422059866.
