Kini mao’y pasiuna nga pahayag sa creative Director sa Sandugo 2019 nga si Lutgardo Labad, human sa usa ka tigum nga iyang gipatawag kauban ang mga manunuwat sa mga posible nga scenario nga sundon sa matag dancing contingent sa Sandugo nga mahitabo sa sunod buwan.
Kon ang mga nanglabay nga Sandugo ritual nagtutok gayud sa Subli o ang linawas nga pagsaduwa sa panaghiusa sa duha ka mga managlahi nga dugo, ang Sandugo 2019, may dyutay na usab nga pagliwag, pahayag sa multi-awarded nga director ug musical scorer nga nailhan na sa tibuok nasud.
Medyo sum-ol na nga ang matag dancing contingent mohimo pa sa linawas nga Sandugo, matud niya.
Karong tuiga, himoon nato nga lahi na usab kay inay ang naandan nga subli, atong ipakita ang diwa sa panaghiusa ug kalinaw, pinaagi sa paghubad ug pagpadayag sa kasaysayan, dugang niya nga pasabut.
Agi og pagdugang sa pagpanudlo usab sa mga Bol-anon sa mga nagpanghitabo sa mga Bol-anon sa taas nga lanat sa panahon, ang 10 ka mga entrante sa Sandugo Street Dancing ug Ritual Competition mopili sa 10 ka mga hugna sa kasaysayan sa Bohol.
Niini, inay nga kasagaran nag Sandugo rituals mao ang pagsandugo, karon, mas pakadak-an ang diwa sa panaghiusa ug kalinaw isip diwas saSandugo.
Matud ni Labad, basehan na sa mga mosalmot ang tagsatagsa ka mga periods sa kasaysayan sa Bohol.
Magsugod ang pili-anan sa karaan nga Bohol gikan sa panahon nga may nanimuyo sa Anda peninsula hangtud sa pag-abut sa katawhan nga Lutao, sundan sa Panahon sa Gingharian sa Dapitan sa mga Lutao hangtud sa pag-abut sa mga Espanyol niadtong 1595.
Ang ika tulo nga hugna sa kasaysayan mag tukmod sa mag dancing contingents nga ipakita ang kasaysayan sa panahon sa mga Espanyol hangtud sa pagpahimo sa katawhan nga mga Katoliko, ug mosunod niini angpanahon sa mga pakigbisug nila ni Tamblot, Dagohoy ug mga Bol-anon nga misupak sap ag-abut sa mga Espanyol.
Apil usab ang panahon sa pagdumala sa mga pari nga Rekoletos, ug ang panahon nga magasaysay sa panghitabo sa Amerkano ug lain usab nga period ang sa panahon sa mga Hapon.
Katapusan nga kapanahonan kadtong panahon sa Bohol human sa gubat hangtud na sa kasamtangan.
Niini, matud ni Labad, magpili ang mga entrantes sa maayong tipik sa ksaysayan ugt adto mobase sa ilang pasundayag.
Tungod niini, milaum ang mga sakop sa Sandugo Foundation nga mas lingaw kini nga panudlo sa mga wala masuheto sa kasaysayang Bol-anon. Rey Anthony Chiu/PIA-Bohol
