Ang kabaw nga inay angay kahadlokan sa iya nga kadak-on, gibestihan og pinatuyo nga ginansilyo aron mas dali duolon sa kabataan, ang milugwa nga mananaug sa gikahinaman nga Carabao Costume atul sa ika 15 nga Katigbawan Festival ug ika 70 nga kasumaran sa pagkatukod sa lungsod sa Catigbian.
Kasagaran nga pista ug mga kasaulogan sa Bohol, naglambigit sa pagpagawas sa tinagu-an nga mga gamit, lakip na ang ginansilyo nga hapin sa mga lamesa ug gamit sa pangurtina sa balay.
Sa Katigbawan, nangurtina na, nagsul-ob pa og stockings nga ginansilyo ang mananaog sa Binistihan nga Kabaw sa katigbawan 2019.
Ang kabaw nga gikan sa Libertad Sur, mikuha og kinatibuk-an nga 93.37 ka puntos gikan sa mga sakop sa hurado ga gilangkoban nila ni Agustin Racho, Narciso Baslang Jr., ug ni Kent Kintanar.
Nakakuha sa ika duha nga ganti sa binestihan nga kabaw mao ang hayop igdadaro nga gikan sa Candumayao, nga nakaugkat sa 86.33 puntos.
Ika tulo nga lugar ang nakuha sa Causwagan Norte nga mitigum sa 86 puntos.
Ang tulo ka nahisgutan nga mananaug sa Binistihan nga Kabaw nga usa sa mga pasunding sa Katigbawan Festival, miapil usab sa 22 ka mga kabaw nga ming-apil sa tinuig nga parada sa mga kabaw, sa lungsod.
Hinuon, sa mga kabaw nga mingsalmot sa parada, gihukman usab ang labing himsug ug haum ang lawas sa iyang panginahanglan.
Nakuha sa Candumayao ang ganti sa kabaw nga labing himsug, samtang ang kabaw sa Causwagan, maoy nakakuha sa ika duha nga pwesto.
Ikatulo usab ang kabaw sa Libertad Sur.
Gawas sa indigay sa kabaw ug sa ka-arte niini, aduna usab gipahigayun nga indigay sa balsahan ng giligdan o mas nailhang karomata sa kabaw.
Nakuha sa Poblacion ang unang pwesto sa karomata nga gihimo nga dagway og payag ug gidayandayanan sa mga utanon, prutas ug mga bunga sa uma.
Ang karomata sa Sinakayanan usab ang ikaduha samtang angsa Poblacion Weste ang mikompleto sa ika tulo nga pwesto.
Matud ni Information Officer Ardessa Estavilla, ang indigay sa mga kabaw ug karomata tipik lamang sa Katigbawan Festival, nga nagsaulog sa katakus sa kabaw ug kabawan sa lungsod.
Sa Catigbian makit-an ang labing dako nga taparan sa kabaw (Auction Center) sa tibuok Kabisay-an, ug dinhi ilang gihatagan og pasidungog ang taparay sa kabaw, isip usab naghatag og dako nga kita sa lungsod.
Gawas sa kabaw, gisaulog usab sa Katigbawan ang katigbi, us aka tanum nga daghan sa Catigbi-an ug maog gigikanan sa pangalans a lungsod.
Ang katigbi, nagpaila usab sa katambok sa yuta nga karon nahimong sentro sa pagpananum og utanon sa Bohol.
Ang Katigbawan usab nagsudo sa pangturismo nga kalihukan sa pagpangsuroy sa mga tigbaw sa lungsod. Rey Anthony Chiu/PIA-Bohol
