Gipatangtang ni Presidente Rodrigo Duterte ang gibutang nga bullet proof glass panel sa dihang mibarog kini og mihatag na sa iyang speech karon lang gabhiona didto sa Lagao Gymnasium, dakbayan sa General Santos.
Si Duterte ang nanguna’y sa ceremonial nga pagpanghatag sa mga Certificate of Land Ownership Awards (CLOA) sa mga benepisyaryo ubos sa Department of Agrarian Reform (DAR).
Sa wala pa kini mosugod sa iyang paghatag og mensahe, iyang gisuginlan ang mga mitambong og nganong gibutangan siya niini.
“Kaning samin dili ni siya pang-cover sa bala. Kaning samin ang makita ra nako ako rang nawong. Ang repleksiyon ani murag nibilib ko sa akong kaugalingon. Ang tinood ani para dili ko mapusilan didto,” matod sa Presidente human gitudlo ang ibabaw nga bahin sa gym.
Nakapangutana usab siya sa mga nitambong og nganong pusilon man siya kay matod niya “wala man ko’y sala”.
Mikatawa ang mga nitambong human iyang gitudlo ang mga naa sa entablado nga diin ang pipila mga retiradong sakop sa militar.
“Pamili mo ngari kadaghan ani oh. Puro man ni military niadto. Puro general. Ayaw ming mga politiko kay nagsilbi lang mi ninyo,” dugang niya.
Iya dayon gimandoan ang mga sakop sa Presidential Security Group (PSG) aron sa pagtangtang sa bullet proof glass.
Kahinumduman nga ang maong bildo gisugdan og butang niadtong buwan sa Abril sa dihang nitambong kini og political rally sa Malabon.
Lima ka sakop sa PSG ang mialsa ug mipakanaog sa maong bildo gikan sa entablado.
Aduna’y 12,548 ka CLOA ang gipanghatag sa 13,585 ka nga Agrarian Reform Beneficiaries sa Region 12.
Sa kinatibuk-an, 24,000 ka ektatya nga agricultural land ang ipang-apod apod sa upat ka lalawigan sa nahisgotang rehiyon diin lakip niini ang North Cotabato, South Cotabato, Sarangani, ug Sultan Kudarat. //