By PR | 08:32 AM May 07, 2026
TAGBILARAN CITY Bohol— Gihangyo sa mga tinugyanan sa National Irrigation Administration (NIA) sa Region 7 ang Department of Agriculture ug ang Buhatag sa Provincial Agriculturist, nga kon mahimo, ipasayo og pagpang-apud-apod ang mga liso nga igtatagud, kay aron mas makalikay sa posible nga El Nino, mas sayu ang pagbuhi sa tubig sa mga irigasyon karon.
Kini ang panawagan sa mga opisyales sa NIA Bohol Cebu Siquijor Irrigation Management Systems ug mismo sa NIA Bohol Integrated Irrigation System, taliwala sa hulga sa gikahadlokan nga El Nino.
Nagdumala sa duha ka labing dagkong irrigation systems dinhi sa Bohol, ang NIA mipasabut hinuon nga may igo pa nga tubig nga ikapasanap sa dul-an sa 6,000 ektaryas nga basakan nga giserbisyohan sa Malinao Dam ug sa Bayongan Dams alang karong tingtanum.
Ang Malinao Dam ug ang Bayongan Dam, gisumpay, ug ang tubig sa Malinao, mahimong ipaagas ngadto sa mas daku og kapasidad nga reservoir sa Bayongan, diin mahimo pa ang dam sa San Miguel makasuplay sa patubig sa duha ka tamnanan, matud sa NIA.
Ang Malinao Dam usab, nagpatibawas na sa iyang mga maintenance activities, ug sugod sa Mayor 18, ipabuhagay na niini ang tubig, igo usab nga makasugod na ang mga irrigation associations sa pagtrabaho sa basakan aron matamnan na dayon samtang wala pa ang gikahadlokan nga taas nga lanat sa init nga panahon.
Matud sa Philippine Atmospheric, Geophysical and Astronomical Services Administration (Pagasa) – Bohol pinaagi ni Engr. Leonardo Samar, gipagawas na sa state weather bureau ang El Nino Alert, ug segun pa sa mga modelo nga gilantaw sa mga nagpaniid sa panahon, mosugod na ang huwaw mga may dyutay lamang nga tsansa sa uwan sa duha ka buwan gikan karon.
Ang huwaw nga giila nga El Nino, gitagna usab nga molanat pa ngadto sa unang mga buwan sa 2027, segun pa ni Samar.
Tungod niini, sa mga tigum sa NIA sa ilang mga irrigation associations, gipahibaw na nila ang pag-paagas sa tubig sa dams sugod sa Mayo 18, mao nga mas maayo nga anaa na sa mga mag-uuma ang igtatagud, aron makasugod nag pananum sa mas sayo nga bahin sa cropping season. (PIABohol)
