By PR | 09:00 AM September 03, 2025
Duha ka proyekto ang gipresentar ni Department of Agrarian Reform Region VII (DAR VII) Regional Director Atty. Shiela Enciso kang Gobernador Erico Aristotle Aumentado atol sa pagbisita niini didto sa Kapitolyo Septiyembre 1.
Gipahibalo ni Enciso nga ang DAR adunay proyekto nga gihinganlan og IPARC kun Inclusive Partnership of Agrarian Reform Community nga ilang i-propose ngadto sa Regional Development Council (RDC).
Buot sa DAR nga ipaagi una kini sa Provincial Development Council (PDC) aron makakuha og resolusyon nga ikaduso ngadto sa RDC.
Mahinungdanon ang resolusyon sa PDC Bohol aron mahiapil sa agenda sa RDC ang programa nga IPARC.
Matud pa nga ang IPARC haom alang sa mga dapit nga adunay daghang Agrarian Reform Beneficiaries (ARB) diin ang yuta nga nadawat gikan sa DAR diha sa maong komunidad mukabat sa 100 kapin ka ektarya.
Mikabat sa 21 ka clusters sa 24 ka mga munisipalidad ang na-identify nang daan sa DAR-Bohol, ug apil kini sa ilang presentasyon ngadto sa PDC sa Septiyembre 9.
Tumong sa DAR-Bohol nga ma-organisar ang maong mga ARBs ngadto sa usa ka kooperatiba o asosasyon aron ilang mapahimuslan ang mga benepisyo sa IPARC.
Adunay component ang IPARC nga Farm-to-Market Roads (FMR) diin mag-identify ang DAR sa mga yuta nga gipanag-iya sa ARBs nga kinahanglang mabutangan og FMR aron mas mapasayon ang ilang pagpanguma ug mas magmabungahon ang ilang produksyon.
Ang Farm Machineries and Equipment (FME) nagtumong nga kahatagan og mga ekipo ang mga ARB subay sa makit-ang panginahanglan alang sa gipalig-on nga pagpanguma.
Sa component nga Agro and Extension Services, palapdan ang pagpadangat sa mga serbisyo nga makatabang aron masangkapan ang mga ARB sa gikinahanglang ayuda ug serbisyo alang sa malahutayong programa ug proyekto.
Pinaagi sa component nga Business Development Services, mahimo nga maka-avail og mga pagbansay kun trainings ang mga ARB nga membro sa kooperatiba ug asosasyon alang sa epektibo nga pagnegosyo sa diha nga nakabaton na sila sa maayong abot o produksyon sa ilang mga kaumahan.
Gikalipay kini sa gobernador ug gipadangat niini ang bug-os nga suporta ngadto sa DAR-Bohol alang sa maong proyekto.
“Sa kanunay mahinangpon kita pagsuporta sa atong mga mag-uuma,” pamahayag ni Aumentado ngadto kang RD Enciso.
Gitumbok sa gobernador ang katuyuan nga pinaagi sa IPARC, posibleng katabangang mapauswag ang kahimtang sa 24 ka mga munisipalidad nga giila sa Philippine Statistics Authority (PSA) nga nahisulod sa poverty incidence.
Sa laing bahin, dugang pahibalo sa DAR nga sa Septiyembre 9 ipahigayon ang distribution sa Certificates of Condonation with Release of Mortgage (COCROM) didto sa Lungsod sa Carmen diin gilauman nga pagatambungan kini sa 150 ka mga ARB.
Ang COCROM usa ka dokumento nga giapod-apod sa DAR subay sa New Agrarian Emancipation Act (Republic Act No. 11953).
Kauban ni Enciso pagbisita sa gobernador sila si ARD for Admin Arthur Dulcero; PARPO II Bohol Dr. Ronald Pumatong; Chief-LTID DAR Bohol, Leonard Cagampang; PARAD Atty. Allan Amazona; Chief Legal Atty. James Horace Balonda; Prov. Chief Admin. Officer Lumirane Calamba; SARPO Corazon Noroño; MARPO-Carmen Esterlita Felisarta; MARPO-Alicia, Neria Lacea; MARPO-Ubay Engr. Jerameel Decasa; MARPO-Talibon Ucenio Tinampay ug ubang mga empleyado. (PIMO/ALT)
