By PR | 07:54 AM May 23, 2025
Patay ang duha ka Bol-anong mananagat human kini malumos sa Brgy. Apo Island, Dauin, Negros Oriental alas 9 sa buntag, Mayo 22, 2025.
Giila ang mga biktima nga sila si Joel Tapsilani, 35, ug Bobong Daomani, 45, parehong residente sa Dauis, Bohol, ug parehong miyembro sa Badjao Community.
Sa report sa kapulisan nga gipadala sa media, gikabutyag nga ang mga biktima gikan sa Dauis, Bohol ug ilegal nga nanagat sa kadagatan sa Apo Island gamit ang pana ug compressor niadtong buntag sa Mayo 22. Ang mga biktima giingong natanggong sa ilawom sa tubig tungod sa kusog nga bul-og sa tubig nga maoy hinungdan sa ilang kamatayon.
Mga alas 3 sa hapon narekober ang mga lawas sa mga biktima ug gidala sa usa ka Funeral Homes sa lungsod sa Bacong. Narekober usab sa mga diver ang mga isda nga ilegal nga nakuha.
Ang Apo Island usa ka world class dive ug marine reserve ug protected area. Nahimo kining sikat nga dive site ug snorkeling destination sa mga turista. With a report from Negros Oriental Updates
