By I. Inojales, Helen Castaño | 11:53 PM May 15, 2025
Ang kampo ni Dan Neri Lim nag-awhag sa Commission on Elections (Comelec) sa pagpasabot sa mga kalainan o discrepancies sa mga resulta sa datos sa bag-o lang natapos nga midterm elections.
Sa post-analysis nila ni Lim ug mga kauban nag-ingon nga naa silay nakita nga wala nagsibo nga resulta.
Sa lumba sa pagkamayor sa dakbayan sa Tagbilaran, ilang gipresentar nga niadtong Mayo 13, 2025 sa alas 12:58 a. m. ang kinatibuk-ang boto nagpakita sa election returns nga napasa sa 64 sa 82 ka presinto: Jane Yap adunay 42,965, Atoy Torralba adunay 29,098. Karon sa Mayo 13, 2025 sa alas 5:02 sa buntag, ang kinatibuk-ang boto gitul-id ug gi-update aron ipakita nga adunay 65 sa 82 ka mga presinto nga naihap: Jane Yap adunay 29,705, Atoy Torralba adunay 20,048.
Sa Congressional Race para sa unang distrito sa Bohol, parehas nga isyu sa pagkamayor. Niadtong Mayo 13, 2025, alas 12:58 sa udto, ang kinatibuk-ang boto: Baba Yap adunay 137,355, samtang si Edgar Chatto adunay 111,538. Karon sa Mayo 13, 2025 sa 7:31 a. m., ang kinatibuk-ang boto: Baba Yap adunay 106,424, samtang si Edgar Chatto adunay 88,649.
“Giunsa kini pagkorihir? Naa bay human intervention aron matul-id ang mga boto nga gipakita?” matud pa sa abogado nga si Kurt Bungabong.
Gikataho usab ni Bungabong nga sa lungsod sa Dauis, 891 ra ang rehistrado nga mga botante sa Totolan, Dauis. Apan niadtong Mayo 13, 2025, nisaka ngadto sa 942 ang gidaghanon sa mga balidong botante kay sa aktuwal nga mga boto ug ang gidaghanon sa mga rehistradong botante.
“Subsequently, gi-correct sa Comelec ang data. Unsaon pagpasabot?” matud ni Bungabong.
Ang kampo nag-ingon nga ang mga glitches, hacking ug pagmaniobra sa sistema posible sa bisan unsang automated nga sistema sa eleksyon, lakip ang gihatag sa Mira Systems, nga nagpamatuod nga kini nanginahanglan konkreto nga digital ug forensic nga ebidensya.
Matud pa ni Lim nga sukad niadtong 2013 dihang gisugdan ang automation, walay protesta nga milampos.
Dugang ni Lim nga nagkinahanglan sila og kalamdagan gikan sa Comelec aron mapreserbar ang integridad sa proseso sa eleksyon.
