By PIA-Bohol | 07:10 AM March 22, 2025
Sa pagmatuod nga may igo nga kapasidad ang mga molupyo, ilabi na sa mga lugar nga delikado ang sunog, malampuson nga napakita sa mga taga Corella, nga kaya sa ilang mga kabataan nga una nga moresponde sa sunog hangtud makaabut na ang bombero.
Sa LGU Corella First Inter-School Fire Olympics, nga gipasiugdahan sa tinabangay nila ni Mayor ManJu Lim ug sa Bureau of Fire Protection Municipal Fire Station uban ni Station Chief Dave Caga, gikapakita sa mga estudyante nga nagcomprise sa mga junior fire brigades sa nagkadaiya nga tunghaan sa sekondarya sa lungsod nga pwede nila nga iresponde sa luwas nga paagi ang sunog.
Ug kay nahitabo sa buwan sa Fire Prevention, mas napahaum sa mga estudyante sa Corella National High School, Canangcaan National High School ug sa Lance Sci Academy nga ikapakita ang ilang mga kapasidad nga mobuhat sa trabahoon sa usa ka tinuod nga bombero.
Sa mga lumba nga gihimo, gipakita ang koordinasyon, kahanas ug kaabtik sa mga indibidwal nga sakop sa brigade, ang abilidad sa pagsul-ob sa fire suit, dali nga paglatag sa firehose ngadto sa lugar nga nasunogan, ilabi na kon dili na masulod sa firetruck, ang koordinasyon sa paggunit sa firehose ug pagpasirit ngadto sa tinubdan sa kayo, pag-akses sa mga lugar nga nasunog ug ang pagpas-an sa mga mamahimong biktima nga tawo sa usa ka fire incident.
Gidayeg usab ni Provincial Disaster and Risk Reduction Management Officer Dr. Anthony Damalerio, ang BFP sa pagpaseguro nga mahatagag prayoridad ang pag-ugmad sa mga kapasidad sa katawhan, ilabi na ang pagtubag sa kabataan sa katalagman.
“Ang mga makat-onan dinhi, maghatag og dugang panudlo sa katawhan sa disiplina ug paglahutay sa mga katalagman nga mahimong moigo sa mga panimalay ug sa komunidad,” matud ni Damalerio.
Kahinumduman nga sa miaging tuig, gihimo usab sa lungsod ang ika duha nga Corella Fire Olympics didto sa Plaza sa lungsod.
Kini giapilan sa LGU Search and Rescue Team ug sa mga Community Fire Auxiliary Groups (CFAG) sa walo ka mga barangay sa lungsod sa Corella.
Ang pag-organisa sa mga CFAGs, ilabi na sa mga school based junior fire brigades, usa sa mga nakit-an nga mga maayong bansay aron pagpilo-pilo sa kapasidad sa mga bombero sa BFP, nga kasamtangan pa nga dili arang makaresponde tungod sa ilang kadaghanon batok sa katawhan nga ilang giserbisyohan.
Sa taho ni Bohol Fire Marshal Raul Bustaliño, sa 93 ka fire trucks ug 711 ra ka mga personahe, ug layo pa kini sa gikinahanglang manpower complement sa mga fire trucks.
Gawas pa, sa sunog, daku na kaayo ang kadaut kon dili kini marespondehan sa unang singko minutos, mao nga importante nga may una nga makaatiman niini, samtang nagsingabut pa ang mga kabomberohan.
Gawas usab sa mga CFAG sama sa high school students auxiliary fire brigades, gipaseguro usab sa mga taga BFP nga ang mag tunghaan, may mga himan sa pamatay sunog sama sa automatic sprinkler systems ug fire alarms sa mga bag-ong buildings, fire extinguishers ug pamatay-kayo sa mga daan nga buildings lakip na ang importante nga regular nga fire drills. (RAHC/PIA-7/Bohol)
