By I. Inojales | 04:55 PM March 20, 2025
Usa ka patay’ng lawas ang napalgan nga naglutaw-lutaw sa kadagatan sa Panglao, Bohol karong hapon, Marso 20, 2025.
Matud sa Panglao Police Station, karung alas-3 sa hapon nakadawat sila og tawag nga nagpahibalo bahin sa usa ka patay’ng lawas nga nakit-an nga naglutaw sa kadagatan sa Barangay Danao, Panglao.
Diha-diha dayon niresponde ang kapulisan nga sila PCMS Armildez ug PSSG Bastasa sa lugar ug nihimo og inisyal nga imbestigasyon diin nasayran nga mga alas 2:58 sa hapon ning petsa, usa ka boatman sa Bohol Tong Floating Bamboo ang nakabantay sa usa ka patay’ng lawas sa usa ka lalaki (nga nag-edad og 50-60 anyos) nga naglutaw sa ibabaw sa tubig dagat hinungdan nga nanawag siya og tabang.
Miresponde usab ang Coast Guard ug PEMRU. Matud pa ni MHO Doctor John Mark Verga, ang gibanabana nga oras sa pagkamatay mga alas 9:00 sa buntag ning petsaha ug acute respiratory failure secondary to drowning nga hinungdan sa kamatayon.
Sa pagkakarun, wala pa nailhan ang maong lalaki. Kung kinsa man kadtong nawad-an ug kabanay sa pamilya or basin naay nakaila aning tawhana palihug ipahibalo sa tagtungod aron makahibawo sila ingun man usab nga makuhaan sa PNP ug kompletong detalye kining maong insidente.
