By PIA-Bohol | 05:12 AM March 17, 2025
Sa pagsugod sa taas nga Festival sa Saulog, nabuksan na usab ang kahigayunan nga ikapasundayag sua mga Tagbilaranon ug sa mga Bol-anon ang pagsaulog sa katawhan, gawas pa sa talagsaon nga kultura sa syudad nga nahimong kasingkasing ug kalag sa Bohol.
Kini maoy unod sa pamulong ni Gobernador Erico Aristotle Aumentado, kinsa masaligon nga ang turismo sa Bohol mas gipa-anyag pa sa pagkama-abi-abihon ug sa pagkamahigala-on sa mga Bol-anon.
Sukad sa panahon nga nahimong hikom sa mga taga Bohol nga mamahimong eco-cultral tourism destination, daghan ang nagtuo nga luyo sa madanihon nga kalikopan nga nakaaghat sa mga turista nga suroyan, ang ka-mangi-abi-abihon sa mga Bol-anon ang usa sa mga labing lanug nga aghat sa pagsuroy sa Bohol.
Ang Saulog magsilbi nga bintana nga magkadayag sa ka-maayo sa ikatanyag sa Tagbilaran ug sa Bohol. Labaw sa tananang mga katawhan ang mas may labing dako nga gikatampo niini, matud sa gobernador.
Sa pagbukas sa saulog nga molantong ngadto sa Kapistahan ni Senor San Jose ang patron sa Tagbilaran, kini na usab ang ika 460 ka tuig nga sumad sa paghimo og Sandugo ni Raha Sikatuna ug sa kapitan sa mga Kastila nga si Miguel Lopez de Legaspi.
Kini na mismo ang nagpakita sa gahum sa pagpakighigalaay alang sa pagpanday sa mas lig-on nga katali-an ilabi na sa pagpatunhay sa kalinaw ug pagmugna og mas nindot nga mga komunidad, dugang ni Aumentado.
Nunot niini, gisaad ni Aumentado ngadto sa Tagbilaran nga sa pagsugod sa kasadya, ang Bohol maningkamot nga makatabang alang sa kalampusan sa Saulog isip timaan sa walay undang nga pagpaambit sa kahiusahan, kultura ug pag-asenso. (CC)
