By PIA-Bohol | 08:59 AM January 24, 2025
Gihimoan sa opisyal nga groundbreaking and labing daku nga proyektong gipundohan sa Department of Agriculture-Philippine Rural Development Project (DA-PRDP) alang sa pagpahiuli ug pagpaayo sa 12 ka kilometros nga Desamparados Calape ngadto sa Tabuan Antequera Farm to market road (FMR), Enero 23, sa Calape.
Mismo si Gob Erico Aristotle Aumentado, Calape Mayor Julius Ceasar Herrera, Antequera mayor Jose Mario Pahang, DA Regional exec Director Angel Enriquez, representante ni Kong Edgar Chatto: atty Abeleon Damalerio, mga taga PRDP ug opisyales sa Bohol lakip na ang mga katawhan nga may kalambigitan sa proyekto nanguna ug mingsaksi sa makasaysayanong kalihukan.
Ang 12.676 kilometros nga karsada nga mingtadlas sa mga barangay sa Desamparados, Ulbujan, Labuon, Binogawan, Cabudburan ug Cabayugan sa Calape ngadto na sumpay sa nasudnong dalan sa Tabuan Antequera sa Antequera San Isidro-Macaas road, may maagian usab nga upat ka tulay nga mahi-apil sa proyekto.
Matud ni Provincial Planning and Development Officer Atty John Vistal, kini na maoy single biggest project sa PRDP sa pagka karon, bisan pa nga ang PRDP, sa kinatibuk-an, nakahatag nag kapin sa P2 B nga bili sa mga FMRs, aron ugmaron ang akses sa mga mag-uuma ngadto sa mga merkado isip agi-anan sa ekonomikanhong pag-ugmad sa us aka lugar.
Gitumbok ni Provincial Engineer Camilo Gasatan ang mga tulay sa Labuon, Binogawan ug Cabayugan nga mga timber bailey bridges nga lisud na nga ayohon sa nagpadayon nga pagpugong sa pagpamultol sa dagkong mga hardwood alang sa susamang mga proyekto, hinungdan nga ang pundo naglakip usab sa 69 linear meters nga standard nga tulay.
Matud usab ni Engr Evelyn Ayuban sa kagamhanang probinsyal sa Bohol, ang tulay nga gipundohan sa DA-PRDP naglaum nga mahatagan og mas sayun nga akses ang mga mag-uuma sa dul-an sa 2,000 ka ektaryas nga mga kaumahan nga maagi-an sa dalan nga makahatud sa ilang mga ani sa merkado.
Niini, dugang niya, ang standard FMR nga may 5 metros ang kalapdon, mahimo usab nga makapaaghat s amga tag-iyahan og luna nga wala pa matandog sa nahisgutang lugar, nga trabahoon na tungod kay may karsada na.
Si Gobernador Erico Aristotle Aumentado, kinsa maoy nanguna sa paghimo sa seremonyas mipadayag nga ang proyekto nga gisugdan sa panahon ni kanhi Gob Edgar Chatto, ug karon na matuman, bayaran sa tanang katawhang Pilipino samtang ang local government units may gipahimutang lamang nga counterpart funds nga mikabat sa P62 miyones, alangs a 608 milyones nga proyekto.
Gawas sa mga kaayohan sa ekonomiya nga mahatag sa pagbukas sa nahisgutan nga dalan, mismo si Calape Mayor Julius Ceasar Herrera ug Antequera Mayor Jose Mario Pahang nalipay kay kini usab nga mga dapit nga agi-an sa bag-ong ayohon nga dalan, mao usab ang mga kanhi gihasi sa mga kalihukang walhon.
Sulod sa maagi-an sa nahisgutan nga karsada, nanimuyo ang 3,842 ka mga bubong sa balay ug direktang makatabang sa kapin sa 15 mil ka tawo nga nia dinhi. (PIABohol)
