By PR | 07:09 PM December 23, 2024
Usa ka malampusong buy-bust operation nga gipahigayon sa Tagbilaran City Police Station (TCPS) nga miresulta sa pagka sikop sa usa ka high-value individual (HVI) ug pagka sakmit sa 13 ka sachet nga adunay sulod nga gidudahang shabu.
Ang mga nakumpiska nga gidudahang ilegal nga drugas adunay gibana-bana nga gibug-aton nga 1,200 gramos ug gibanabana nga may standard drug price (SDP) nga P8,160,000.00.
Ang operasyon nahitabo sa Purok 7, Dangoy Street, Barangay Bool, dakbayan sa Tagbilaran mga ala 1 sa kaadlawon, Disyembre 23, 2024.
Ang mga nasikop naila nga usa usa ka 22 anyos nga boatman gikan sa Purok 1, Barangay Libaong, Panglao, Bohol. Ang suspek gikonsiderar nga usa ka mahinungdanong notado sa illegal nga drug trade sa maong dapit.
Anaa na siya karon sa kustodiya sa kapulisan ug mag-atubang og kasong paglapas sa Republic Act 9165 o Comprehensive Dangerous Drugs Act of 2002.
Ang TCPS gipanguluhan ni Police Lt. Col. John Escober, chief of police.
Si Col. Arnel Banzon, provincial director sa Bohol Police Provincial Office (BPPO) , midayeg sa paspas nga koordinasyon ug paningkamot sa tanang unit nga nalambigit sa operasyon. Iyang gisubli ang dedikasyon sa kapulisan sa pagwagtang sa ilegal nga drugas sa komunidad.
Samtang si Lt. Col. Norma Nuez, tigpamaba sa BPPO, niawhag sa publiko nga suportahan ang Philippine National Police (PNP) pinaagi sa pagtaho sa bisan unsang ilegal nga kalihokan sa ilang lugar.
Giawhag usab sa BPPO ang mga residente nga magpabiling mabinantayon ug i-report ang bisan unsang kadudahang kalihokan pinaagi sa mga opisyal nga hotline number niini.
