By PIA-Bohol | 12:16 PM December 18, 2024
Sa ikatulo nga tuig, gihimo sa Association of United Development Information Officers sa Bohol (Audio-Bohol) ang ilang tinuig nga social responsibility: ang paghatag og mga pinaskohan ngadto sa mga nanginahanglan sa tabang.
Didto sa Bohol District Jail Female Dormitory (BDJ-FD), gitanyag sa mga sakop sa Audio Bohol pinangulohan ni Doris Isabel Racho, ang mga bags nga gisudlan sa hygiene kits ug mga kagamitan nga magamit sa mga piniriso, samtang nagpaabut sila nga mahusay ang ilang mga kaso.
Niadtong miaging tuig, didto ang Audio Bohol sa usa ka Barangay sa Bien Unido ug nanghatag og mga school supplies ug mga candies sa mga kabataan, isip pinaskohan, saysay ni Racho, didto sa ilang hamubo nga programa sulod sa BDJ compound.
Sa miaging tuig pa, didto usab ang Audio sa bukiran nga barangay nga gipamuy-an sa mga Eskaya, candies ug mga preloved nga mga tshirts, school supplies ug mga duwaan ang gitunol sa mga sakop sa kahugpungan ngadto sa dul-an sa usa ka gatus ka kabataan didto sa Biabas Guindulman, dugang niya.
Walay labing datu nga walay panginahanglan, ug wala usab labing pobre nga walay ikahatag, kini ang dugokan ngano nga ania kita karon, saysay sa Philippine Information Agency kinsa maoy may supervisory control sa kahugpungan sa mga information officers.
Matud ni Racho, dili datu ang Audio, ug gani, nagtampo na sa mga kahinguhaan aron makompleto ang pinaskohan ilabi na alang sa mga babaye nga naa sa prisohan, kinsa manginahanglan sa mga gamit sa personal nga kalimpyo.
Nalipay mi og dako, sugid sa usa ka piniriso nga wala makapugong sa pagtulo sa iyang luha, tungod kay abi man namo og wala nay makahinumdom kanamo, nia diay mo.”
Gawas sa pinaskohan, may gisawhan usab sila nga mga pama-init alang sa kalihukan nga didto himoa sa sulod sa compound sa prisohan.
Matud ni Female Jail acting Warden Maria Jessa Joy Torreon, ang pagpanghatag sa pinaskohan, dako kayo og ikatabang kay kini dili lamang material nga mga butang apan simbolo sa paglaum, kalooy ug paghatag ug ikaduhang kahigayunan alang sa mga piniriso.
Daku kayo ni og impact sa well being sa atong mga persons deprived of liberty nga makapa-aghat kanila sa husto nga rehabilitation, pagpalig-on sa ilang konseksyon ngadto sa katilingban, dugang niya.
Ang bahan sa Audio- Bohol gilangkoban ni Racho, Elvie Bongosia kalihim sa Audio ug mga opisyales nga sila si Rojer Lindo sa Tubigon, Julius Soriano sa Alicia, Zarline Sambas sa National Irrigation Authority ug Rey Anthony Chiu. (PIABohol)
