By Rey Anthony Chiu | 06:05 PM November 08, 2024
Subay sa programa sa Administrasyon ni Gob. Erico Aristotle Aumentado ug Bise Gob Tita Baja, kauban ang pangingkamot ni Congresswoman Vanessa Aumentado nga haw-ason ang mga isla sa Bohol sa kalisud, gidala sa Capitolyo ang mga hinabang ug medical team ngadto sa isla sa Maomawan sa Bien Unido.
Kini dili lamang sa pagpanghatag sa ayuda apan usab aron pagamhan ang katawhan nga maningkamot usab alang sa ilang kaugalingong lingkawasan, tungod sa kahimtang niining dili sayun nga padangatan sa mga serbisyo ug menos sa kapilian sa panarbaho.
Samtang gihangop sa mga katawhan sa mga isla sa Brgy. Maomawan, ug Hingutanan Bien Unido sila si Gob. Aumentado, 2nd District Congw. Van-van Aumentado, ug Bokal Jamie Aumentado Villamor kinsa nangadlawon nga mitabok sa mga isla, Nobyembre 7, 2024, gipahinumdom usab sa mga tinugyanan nga ang ayuda, igo lamang temporaryo nga solusyon ug ang pagpaningkamot sa katawhan, mao ang mopatunhay sa pag-ugmad, inabagan sa Kapitolyo.
Sa pagbisita sa mga opisyales, bitbit nila ang mga tseke agi og hinabang pinansyal gikan sa kagamhanang probinsyal: P1 milyon alang sa isla nga barangay sa Maomawan, nga unang gitagana sa lokal nga mga opisyales alang sa pagtibawas sa pagtrabaho sa ilang covered court nga mahimo usab nga evacuation facility kon ay dautang panahon nga mohasi sa isla.
Gawas niini laing P25 mil nga tseke isip para sa barangay aid ug laing P 200 mil nga tseke alang sa Isla Hingutanan East ang gitunol sa gobernador.
Samtang si BM Jamie Aumentado Villamor mihatag sa dugang 50 mil pesos para sa nasangpit nga Isla, gikan sa iyang pahat sa Sangguniang Panlalawigan.
Sa iyang kabahin, si 2nd Dist. CongW Van-van Aumentado, migahin og tag P5 mil para sa mga Brgy. Health Worker, sa Maomawan samtang misaad usab ang babaye nga Kongresista sa laing P1milyon alang sa Multi-purpose Building sa Isla Maomawan.
Ug sanglit, temporaryo lamang ang mga ginagmay nga hinabang, sa kalisud sa kinabuhi sa ilsa, gawas sa abag pinansyal, gidala usab sa bahan ang Medical Outreach Unit sa Kapitolyo aron maghimo sa medical mission.
Kauban sa mga mananambal gikan sa Provincial Health Office, kinsa maoy nangunay sa pagcheck up sa mga kahimtang sa panglawas sa mga katawhan sa isla, may bitbit usab sila nga mga tambal, ug bugas gikan sa kagamhanang probinsyal.
Sa iyang pakigpilulong, si Gob. Aris Aumentado miingon nga samatang ang Isla Maomawan may sugang dagitab ug covered court na, gusto sa gobernador nga matagamtaman sa mga islahanon ang tubig mainom.
Us aka Seawater desalination plant nga maghimong tubig-tab-ang gikan sa tubig dagat ang gisaad sa gobernador nga ibutang sa isla.
Kini gikalipay sa mga taga isla kay sa dugay nga panahon, nagsalig sa sinawod tubig uwan o sa mahal nga tubig mineral nga gikompra gikan pa sa mainland.
Kauban sa bahan sa gobernador mao ang LMP president ug mayor sa Pitogo, Fernando Estavilla, ang mga buhatan sa OPSWD, PHO, ug uban pa.
Ang Isla Maomawan adunay kinatibuk-ang mga residenti nga moabot sa 1,200 ka mga indibidwal, samtang ang Isla Hingutanan East may 1,300 ka mga residenti nga indibidwal.
