By J. Jala | 05:41 PM August 24, 2021
Usa ka kuting nga ang ulo na-trap sa usa ka lata sa sardinas malampusong na-rescue sa lungsod sa Tubigon.
Matud sa Tubigon Local Government Facebook page, ang maong kuting giluwas ni OIC-Municipal Agriculturist Engr. Razel “Dada” A. Palma.
Nahitabo ang pagrescue sa likod nga bahin sa munisipyo, sa gawas sa buhatan sa Municipal Agriculturist.
Tungod sa pandemic, nabatasan na sa mga staff sa MAO ang pag-abli sa ilang mga bintana aron dunay agi-anan ang hangin pasulod ug pagawas sa ilang buhatan.
Base sa mga staff sa MAO, sa dihang nakita nila nga nagkalisod pagtangtang ang usa ka iring sa lata nga naa sa iyang ulo, dali gyud nilang gipahibalo si mam Dada nga usa ka maalimahon sa mga mananap.
Wala’y taas nga minuto nga gihulat, giadto gyud dayon ni mam Dada ang nahimutangan sa iring aron sa pagluwas niini.
Gisusi na karon sa mga staff sa MAO kung diin magagikan ang lata nga naka-trap sa ulo sa iring.
Sa pagkakaron, anaa na sa luwas nga kahimtang ug gisagop sad ni mam Dada si Johnxan, nga maoy ilang gingalan sa naluwas nga iring.
