By Ric Obedencio | 11:36 AM August 08, 2024
Si Konsehal Nick Besas sa Tagbilaran City mao ang nasabotan sa hugpong Abante nga mamahimong molansad sa pagka-bise-gobernador ug ka-tandem ni Gob. Aris Aumentado sa umaabot piliay sa sunod tuig, matud sa usa ka kasaligang tinubdan.
Si Besas mao ang amahan ni Kongresista Kristine Alexie Besas Tutor, kasamtangang congresswoman sa 3rd district. Ug si Besas mao ang kasamtangang konsehal sa Tagbilaran city.
Kini nga kasayuran gibutyag sa kasaligang sakop sa Abante human sa ilang tigum ganinang hapon sa Panglao alang sa exclusive news sa BBDN.
Si Nick Besas ang milingkod karon isip ex-officio member sa Sangguniang Panlalawigan (SP), nag-representarsa Philippine Councilor’s League (PCL) Bohol chapter human gitugyan kaniya gikan ni San Isidro councilor Gloria Biwang Gementiza sumala sa sabot sa term-sharing.
Si Willy Ramasola, usa ka social mediainfluencer ug crusader sa good governance, nasulod sa tulo ka mga molansad pagka-board member sa unang distrito. Uban kaniya mao sila si reelectionist Lucille Lagunay ug si Goldie Herrera, anak ni Calape Mayor Atty. Julius Caesar Falar Herrera.
Si Mayor Fernando “Eping” Estavilla, kinsa anaa na sa iyang ika-3 nga termino, isip mayor sa Pres. Carlos P. Garcia (Pitogo) mao ang ika-3 alang sa pagka-Board Member sa segundo distrito.
Uban kaniya (Estavilla) magpa-subli mao sila si beteranong Board Member Atty. Tomas “Tommy” D. Abapo, Jr. ug si BM Atty. Jamie Aumentado Villamor.
Si DJ Balite, anak ni kanhi bise-gob. Dionisio Victor A. Balite, nasabotan nga mao ang ika-4 nga kandidato sa pagka-Board member sa 3rd district. Ang iyang kauban mao ang magpasubli sa pagka BM sa 3rd district: BM Tita V. Baja, BM Crispinito “Greg” Jala ug BM Natahniel “Atan” O. Binlod.
Sa pagka-kongresista sa first district, ang Abante wala pa’y hipno nga deklarasyon sa pagpaluyo kang kanhi city Mayor John Geesnell “Baba” L. Yap, kinsa mi-abiso na nga modagan sa pagka-congressman sa first district batok ni incumbent Cong. Edgardo Chatto, matud sa tinubdan.
Sila si kasamtangang Congresswoman Maria Vanessa C. Aumentado (second district) ug Congresswoman Tutor (3rd district) magpasubli ubos sa bando sa Abante, ang tinubdan nidugang sa pagbutyag.
Si Congw. Aumentado molansad alang sa iyang ika-2 nga termino, samtang si Congw. Tutor sa iyang katapusang termino sa pag-alagad sa 3rd district. (rvo)
