By PR | 02:21 PM April 30, 2024
Nagpagawas og pahimangno ang Office of the Vice President (OVP) batok sa mga tawo nga nagpatuong mga kawani niini o dunay koneksyon sa maong buhatan.
“Makipag-transaksyon lang sa mga lehitimong opisina ug empleyado sa OVP,” matud pa sa pahimangno.
Giawhag usab niini ang publiko nga itaho kung dunay kadudahang mga transaksyon nga gigamit ang OVP.
Giawhag ang katawhan nga ipadangat ang taho ngadto sa mga OVP hotlines 8352-5942 o 8370-1719.
Mahimo usab nga ipadangat ang taho sa labing duol nga presinto sa kapulisan.
Ang pahimangno nga pinetsahan og Abril 29 maoy labing ulahing pagpahinumdum batok sa modus nga sama niini.
Di ikatingala ang pagsalga sa mga modus nga gihapinan sa pangalan sa OVP.
Kini ilabina nga kanunay nga nag-una sa tanang mga surveys sa mga posibleng kandidato sa piniliay sa 2028 si Bise Presidente Sara Duterte.
Sa gihimo nga survey sa Oculum Research and Analytics, si Bise-Presidente Duterte nakakuha sa suporta sa 42% sa gipangutana sa tibuok nasud.
Sa survey nga gihimo niadtong Pebrero 21-29 sa 3,000 ka tawo, halos katunga sa gipangutana pabor kang Bise Presidente Inday samtang gibahin-bahin na sa pito ka mga ginganlan ang 40%. 14% ang wa pay kandidato samtang 2% way interes niini.
Ang Bise-Presidente usab maoy labing kasaligan sa mga opisyales sa nasudnong kagamhanan. Ang Department of Education diin sya nagsilbing kalihim mao usay labing gisaligan ug gikauyonan nga ahensya sa gobyerno.
Dunay labing menos walo ka mga satellite offices ang OVP. Lakip na niini ang mga buhatan sa Dagupan, Cebu, Tacloban, Bacolod, Zamboanga, Davao, Tandag ug Cauayan, Isabela.
Di pa dugay, gibisita ni Bise-Presidente Inday ang OVP satellite office sa Cauayan, Isabela nga nag-alagad sa katawhan sa Cagayan Valley.
Tungod sa gipakig-ambit nga nagkalain-laing serbisyo bisan pa sa mga suok nga dapit, duna usay mga tawo nga magpahimulos pinaagi sa pagpangilad o budol sa mga katawhan ilabina niadtong nagpadayag og tinguha nga motampo sa paningkamot ni Bise-Presidente Inday.
