By PR | 09:26 PM June 05, 2024
Nagkahugop ang mga barangay opisyales sa 1,109 ka barangay sa lalawigan alang sa usa ka Liga ng Barangay (LnB) -Bohol Chapter Provincial Congress nga gipahigayon sa Dakbayan sa Tagbilaran, adlaw’ng Myerkules, Hunyo 5 ug magpadayon hangtod sa petsa 7.
Kini, pinaagi sa pagpanguna sa mga presidente sa Liga ng Barangay sa 47 ka mga munisipalidad ug sa dakbayan sa Tagbilaran uban sa mga Board of Directors niini, ubos sa liderato sa LnB President Bohol Chapter Romulo G. Cepedoza.
Gisugdan kini sa usa ka welcome message sa representante ni acting vice governor Tita V. Baja, nga si Atty. Glen Anino, ug sa mensahe gikan ni Tagbilaran City Mayor Jane Yap, uban ang statement of purpose gikan ni LnB Vice President Rudy Tutor isip representante sa nahisgutan nga LnB President.
Si DILG-Provincial Director Jerome Gonzalez, nga presente sa maong kalihukan mipadangat sa mga pagdasig ngadto sa tanang opisyales, taliwala sa mga giatubang nga mga pagsulay karon sa Bohol sama sa El Niño ug ASF.
Mihatag usab og mensahe sa pagdasig ngadto sa mga barangay opisyales, ang mga bokal sa Sangguniang Panlalawigan nga sila si Bokal Greg Crispinito Jala, Bokal Aldner Damalerio, Bokal Venzencio Arcamo, Bokal Lucille Lagunay, Bokal Nathaniel Binlod ug SK Provincial Federated President Lawrence Ancla.
Ang matag usa kanila mipadangat sa ilang pasalamat ngadto sa mainiton nga kooperasyon sa mga barangay opisyales sa maong kalihukan ug sa padayon nga paghiusa ug pagtinabangay taliwala sa hagit sa pagpanerbisyo.
Uban kanila si Atty. Abel Damalerio nga representante ni Congressman Edgar Chatto ug executive assistant Jun Flores nga maoy mipadangat sa mensahe ni Congresswoman Vanvan Aumentado.
Ang keynote speaker nga si acting vice governor Tita V. Baja, mao ang nanguna sa pag-abiabi sa pinasidunggan nga bisita nga si Mr. Malasakit, Senador Bong Go, chairman sa committee on Health and Demography ug sa Sports, diin kauban niini ang aksyon star nga si Phillip Salvador.
Si Sen. Bong Go, mipadangat sa iyang pagtimbaya kang Gobernador Aris Aumentado ug nagpasalamat ngadto sa mga Bol-anon sa suporta ngadto sa iyang mga proyekto sa probinsya.
Si Go nauna nang mibisita sa natukod nga superhealth center sa Panglao ug Dauis, diin matud pa, kapin sa 600 ka mga superhealth centers ang tukuron sa tibuok nasod ug sa Bohol ginasugdan na ang 16 niini ka mga superhealth centers.
Sa laing bahin, tumong sa maong kalihukan ang kukabildo ug solusyon kabahin sa Provincial Health Programs, ASF and Rabies Eradication Program, Provincial Agricultural Growth ug Disaster Risk Reduction Management. PIMO/ALT
