By PR | 01:06 PM April 08, 2024
Dakung kalipay ni Bise-Presidente Sara Duterte nga “ikauban, mahimamat ug mangumusta” sa mga Pilipino matag higayon nga mobiyahe gawas sa nasud.
“Usa sa labing gipaabot nako nga mahitabo matag higayon nga atua ko sa ubang nasud mao ang ikauban ang atong mga isig ka Pilipino ug mangumusta kanila,” matud pa sa Bise-Presidente.
Niadtong milabay nga buwan, didto si Duterte sa nasud sa Cambodia kalabut sa iyang katungdanan isip Presidente sa Southeast Asian Ministers of Education Organization (SEAMEO) Council.
Atol sa maong panaw, ang Bise-President nga nag-alagad usab Isip Kalihim sa Department of Education, pormal nga nakig-atubang kang Deputy Prime Minister Neth Savoeun sa iyang buhatan sa Phnom Penh, Cambodia.
Matud pa ni Duterte, usa sa ilang gihisgutan mao ang mas gipalawom nga relasyon tali sa Pilipinas ug Cambodia sa natad sa edukasyon, ekonomiya, seguridad, turismo ug trabaho.
Gipadangat sa Bise-Presidente ang iyang pagpasalamat sa mainiton nga pagdawat sa iyang delegasyon.
“Ato usab nga gipaabot ang pagpasalamat sa ilang pag-atiman ug suporta sa atong mga kababayang Pilipino nga atua nagpuyo ug nagtrabaho sa ilang nasud. Atong nasayran nga maayo ang ilang pagdawat sa atong mga kababayan sa Cambodia,” matud pa niya.
Nakighimamat usab ang Bise-Presidente kang Dr. Hang Chuon Naron sa Minister of Education, Youth and Sports (MoEYS), usa usab ka mga Deputy Prime Minister sa maong nasud. Ang MoEYS maoy buhatan sama sa DepEd sa Pilipinas.
Sama sa iyang naandan sa milabay niya nga mga byahe gawas sa nasud, wa pakyasa ni Duterte nga makighimamat sa mga kababayan sa Cambodia.
“Gaan ang akong gibati dihang nasayran nga maayo ang pag-abi-abi kanila sa kagamhanan sa Cambodia ug nagpadayon nga pakig-alayon sa maong nasud. Dakung garbo nako ang ilang kalampusan sa nagkalain-laing natad diin naila ang atong mga kababayan,” matud pa sa Bise-Presidente.
Bisan pa sa kadaghan sa iyang kalihukan, gilugaran gayud ni Duterte ang pagduaw sa Philippine International School of Phnom Penh nga gipanag-iya ug gidumala sa mga Pilipino. Atol sa maong pagduaw, iyang gigahinan og panahon ang mga tinun-an sa maong tunghaan ug gani iya kining gibasahan lakip na ang libro nga iyang sinuwat.
