By Marisol Bo-oc | 11:49 AM April 05, 2024
Duha ang patay ug upat ang samaran human nanigbas ang usa ka lalaki nga gituhuan nga wala sa saktong pangisip didto sa lungsod sa Lila, Bohol.
Nahitabo ang insidente pasado alas 10 sa buntag kagahapon, Abril 4 didto sa Barangay Calvario sa naasoy nga lungsod.
Sumala sa taho sa kapulisan, ang suspek nga giila nga si Rito Quimba, pila na kini ka adlaw sige’g inum ug kalit lang nanigbas sa iyang pamilya gamit ang hait nga sundang.
Patay diha diha ang iyang inahan nga si Leona Quimba, 70 anyos. Ang iyang iyaan nga si Vivencia Quimba, 79 anyos, patay nga nahidangat sa tambalanan.
Ang laing upat ka mga sakop sa pamilya uyuan ug ig-agaw ang nahilandig sa tambalanan human makaangkon sa mga nagkadaiyang samad sa kalawasam.
Mingsukol ang suspek sa pagresponde sa kapulisan. Ang suspek nakaangkon sa samad pinusilan sa abaga ug paa sa parte sa lawas niini. Gidala usab kini sa tambalanan.
