By Rey Anthony Chiu | 08:00 PM March 20, 2024
Alang sa dugang pagpalapad sa Bureau of Fire Protection sa kasayuran kabahin sa kapasidad sa mga kabomberohan, gibansay niini ang mga sakop sa Association of United Development Information Officers sa Bohol (AUDIO Bohol) sa high angle rescue.
Kini samtang naghost ang BFP sa AUDIO sa ilang binuwan nga Bisita Opisina, diin gipakita sa BFP ang bag-o lang gyud nga nahuman nga Panglao Fire Station nga usa sa mga labing moderno nga estasyonan sa kabomberohan sa Bohol.
Matud ni Fire Officer1 ug BFP Information Officer Gian Paolo Dolotina, mahinungdanon ang kasayuran ilabi na sa mga bombero tungod kay sa ilang abaga nakapatong ang misyon sa pagtabang sa angayan tabangan.
Sa kasagahan nga opinion nga ang trabaho sa kabomberohan mao lamang ang pagpatay sa sunog, giigngon ni Dolotina nga ang BFP may lain pang gimbuhaton kay sa pagbantay ug pagpamatay sunog.
Lakip na niini ang search and rescue, retrieval ug emergency medical services.
Sa mga kaso sa sunog nga naglambigit sa pagpalingkawas sa tawo gikan sa nasunog nga building, importante nga nasayud ug may pagpili na sa mga angay buhaton sama sa paghimo sa high angle rescue o sa standard nga pagpalingkawas sa biktima.
Sa kaso sa mga katalagman, mas maayo nga may kasayuran ang usa ka tawo aron mas magiyahan sa angay buhaton, dugang sa opisyal sa kabomberohan.
Gamit ang pisi, mga carabiner ug ang technical nga mga climbing ur rappelling equipment, aron ang usa ka technical rescuer makabaton ug lahibaw sa paghimog high angle rescue.
Sa laing bahin, ang estasyonan sa kabomberohan sa Panglao, maoy usa sa tulo ka mga bomberohan nga tukoron nga labing dagko.
Ang uban nini mao ang P30 Milyones nga Tagbilaran City Fire Station nga may P30 M ang pundo nga napahat, ang P25 M nga bomberohan sa Panglao, Trinidad ug Candijay. (rahc/PIA-7/Bohol)
