By Rey Anthony Chiu | 08:15 PM February 27, 2024
Bisan pa nga napatyan ang kapolisan nga paingon unta magtunol sa warrant of arrest ngadto sa Most Wanted Person sa Bohol, nakuha pa gihapon nga isyagit sa kapolisan ngadto sa pundok sa mga armadong rebelde sa sulod sa balay nga ilang gikatulgan, nga mosurrender na lang.
Kini maoy gisaysay ni Jonas Bantolinao, ig-agaw sa tag-iya sa balay nga gipundohan sa mga armadong kauban ni Domingo Compoc, most wanted person sa Bohol, niadtong pagkasinukli-ay sa bala ang mga gituohang rebelde ug mga kapolisan nga naghimo sa Joint Enhanced Military ug Police Operations (JEMPO) aron dakpon si Compoc, nga nasayran nga anaa sa us aka ablay sa Sition Camucom, Matin-aw 2, Campagao, Bilar.
Si Jonas Bantolinaw, kinsa maoy silingan sa balay nga gipahuwayan sa bahan ni Compoc niadtong gabhiona, mipadayag nga human sa unang sinukli-ay sa bala, iyang nabati ang kapolisan nga misinggit sa mandu sa pagsurrender.
“Bay Marlon, surrender na lang mo Bay, mingsurrender na ang imong Papa ug Mama gahapon,” saysay ni Bantolinao, subay sa iyang nabati.
Gidasonan usab kini ni Elizabeth Bantolinao, silingan, nga iyang nabati: “Marlon, surrender na kay imog Mama ug Papa misurrender na. Di lagi ka hilabtan. Surrender na mo.”
Kini tubagon lamang og tinagsa nga buto, dayun bawsan dayon sa dagkong buto, segun pa nila.
Mingtahan sa ilang kaugalingon ngadto kang Mayor ug abogado Julius Ceasar Herrera sa Calape sila Ciriaco Omosura alias Victor, 56 anyos, kinsa aktibo sa kalihukan hangtud sa 2021 ug si Maria Omosura, 52, aktibong sakop sa Gabriela, asawa ni Victor ug pulos taga Purok 7, Sampoangon Calape.
Ang mingtahan, mga ginikanan ni Marlon Omosura alias Darwin, kinsa kauban ni Domingo Compoc ug sa tulo pa ka kaubanan niadtong panahona.
“Wala ko makadungog nga nay mi-ingon nga mosurender na mi,” dugang gipatin-aw ni Jonas Bantolinao, kang kinsang balay, wala ray 10 metros gikan sa balay nga gitago-an ni Compoc ug mga kaubanan.
Si Jonas, kauban sa iyang silingan nga si Elizabeth ug gagmay nga mga bata, napugos na lang og hapa, aron dili ma-igo sa possible nga saag nga bala sa sinukli-ay.
“Akong gipangpasok ang mga bata sa ilawom sa katre, saysay usab ni Elizabeth dihang nagbinuthanay na.
Niadtong mga panahona, walay laing tawo nga didto ug wala na gani makagamit ang mga silingan sa ilang mga cellphones, kay gidid-an sa mga kapolisan. Kini usab gidasonan ni Mercedez Bantolinao, anak sa tag-iya sa balay nga gisak-an sa mga armado.
Posible man gud nga kon may mogamit og selpon, itext ang lokasyon sa panagbagat ug makapanawag og reinforcement ang mga rebelde, nge delikado usab sa kapolisan.
Samtang ang kapolisan ang naghimo sa pagtunol sa warrant ug pag-atubang sa mga armadong tawo, ang mga sundalo usab didto nag-atang sa likod sa bungtod aron ilang makuha ang kinsa man ang moipsot.
Didto na nakuha sa mga sundalo si Marlon Omosura, kinsa nakahigayon og dagan saka sa bungtod aron unta moikyas, biniyaan ang nagkalisud niining nmga kaubanan.
Si Omosura, napusilan-patay sa mga sundalo, didto na sa luyo sa bungtod, duol sa may fishpond.
Patay usab didto sa hitabo si Alberto Sancho (taga Sugbo) nga naghupot pa sa iyang armalite, si Parlito Historia (unang gitaho nga Segovia) alias Aldrin, political guide, assistant squad leader ug naggunit sa kalibre 45 nga pistol.
Namatay usab si Hanna Joy Cesista, kinsa abogado ug taga Catubig Northern Samar, giila usab nga asawa sa kalihukan ni Parlito, ug si Compoc nga gidepensahan sa tulo apan way swerte nga natanggong sa kilid sa balay ug sa pangpang nga dili niya dali nga masaka.
Si Compoc, may bitbit pa nga armalite, diha sa iyang gikatumbahan. (rahc/PIA-7/Bohol)
