By PR | 10:31 PM February 05, 2024
Posibleng sugdan sa Bohol ang usa ka digital platform nga gitawag og Mandatory Health Record Application (MHRA) kung malampusong ikapatuman niini ang Primary Care Implementation Plan (PCIP) gikan sa Universal Health Care Act (UHCA).
Natuki kini atol sa pagbisita sa mga tinugyanan sa United States Agency for International Development (USAID) sa buhatan ni Gobernador Erico Aristotle Aumentado sa Kapitolyo niadtong Pebrero 1.
Atol sa maong pagduaw, nahisgutan ang mga benepisyo nga ikatabang sa MHRA, usa ka app nga dako kaayog ikatampo sa serbisyo sa panglawas sa katawhan.
Pinaagi sa MHRA nga gi-download sa barangay health worker, makahimo kini pagsubay sa kahimtang sa pasyente human kini makuhaan sa mga gikinahanglang impormasyon sa iyang panlawas.
Tumong sa USAID uban sa DOH nga maplastar ang Local Health System sa tanang dapit sa nasod ug kini mahimo nga sugdan sa Bohol, kung malampuson niini nga maimplementar ang PCIP pinasikad usab sa gikan sa UHCA.
Ang bahan sa USAID nga miduaw dinhi inubanan ni Dr. Jeson Butcon ug Dr. Naida Bautista.
Ang maong app kasamtangan na nga ginasuwayan paggamit sa mga kabarangayan partikular sa unang distrito aron makita ang mga kakuwangan niini ug mahapsay.
Sumala pa ni Dr. Cesar Tomas Lopez sa Provincial Health Office (PHO), nga base sa demonstrasyon sa unang distrito, dunay gipanghatag ang mga hingtungdan nga mga “tablets” aron mapasayon sa mga BHW ug mga public nurse sa ilang pagkat-on sa maong “application”.
Dugang ni Lopez ang app mahimo ra nga i-download sa mobile phones. Pinaagi sa MHRA nga gi-download sa BHW, mahimo na nga magpadayon ang serbisyo sa pasyente.
Sa pagtuplok sa BHW maong app sa iyang cellphone, makahimo kini pagkontak sa Municipal Health Officer (MHO) sa lungsod. Ping ning maong app, makahimo usab pagduso sa pasyente ngadto sa health station o pampubliko nga ospital sama sa Governor Celestino Gallares Memorial Hospital (GCGMH) aron maatiman dayon ang pasyente.
Gamit ang MHRA, masayran usab kung ang mga tambalanan nga giduol milihok ba dayon paghatag sa tukma nga serbisyo nga gikihanglan sa mga pasyente.
“Empowered na tanan through the app, hopefully masulbad na ang problema (diin) luoy kaayo pobre, kumo kay pobre dili na maatiman..Sa mando ni Gov. Aris nga everyone should respect tha app, ma-trace kung ganus-a gi-refer, kung walay aksyon ma-call out ang facility.” pamahayag ni Lopez.
Gawas kang Lopez, kauban sa gobernador sa maong tigum si provincial administrator Asteria Caberte, Dr. Greg Sodusta, Dr. Emerson Mateo, Artemia Lison, ingon man ni Pacholo Alcantara, ug Ruth Del Prado sa Department of Health.
Matud pa ni Aumentado nga kung mahimong pilot province ang Bohol sa pag-implementar sa PCIP, dungy kahigayonan ang lalawigan nga makadawat sa usa ka grant nga nagkantidad og P50 milyones gikan sa USAID.
Ayuda kini alang sa implemetasyon sa primary care services sa Bohol ubos sa PCIP.
Atol sa maong tigum, nasayran nga gikatakda mutambong si Aumentado sa usa ka forum sa Shangrila Hotel karong Pebrero 28 diin motambong mismo si Presidente Ferdinand Marcos Jr. aron paminawon ang sa presentasyon sa Bohol bahin sa pagpatuman niini sa MHRA sa lalawigan.
Subay niini, gipadangat ni Aumentado ngadto kang Dr. Anthony Cu, Director IV sa Bureau of Local Health Systems Development nga interesado ang kagamhanang probinsyal nga mahimong pilot province alang sa implementasyon sa PCIP.
Kung maaprobahan kini sama sa pag-ila sa UNESCO sa Bohol Island isip pinakaunang Geopark sa tibuok nasod, ang Bohol mapasundayag usab nga pinaka-unang lalawigan nga nakaimplementar sa maong digital app.
Taming sa gobernador nga makabaton ang Bohol og mas komprehensibo ug epektibo nga referral system gikan sa kabarangayan paingon sa mga ahensya ug tambalanan nga nagahatag sa serbisyong panlawas pinaagi sa MHRA.
Kini aron usab masiguro nga ang kagamhanang probinsyal makahatag sa tukma nga serbisyong panlawas ngadto sa katawhan subay sa strategic change agenda.PIMO/ALT
