By PR | 02:53 PM January 25, 2024
Gibana-bana nga 848 ka mga atleta ug mga coach ang gikatakda nga musalmot sa ipahigayon nga first district congressional athletic meet sa lungsod sa Catigbian.
Ang mga duwa gitakda sa Catigbian Central School Oval.
Ang Division of Bohol sports program sa tuig 2023-2024 subay sa Division Memorandum No. 0434 s 2023 diin gitakda ang nahisgutang meet sa Enero 26-28.
Tumong sa tulo ka adlaw nga kalihukan ang pagtino sa mga kwalipikado nga atleta nga maoy ipadala alang sa umaabot nga provincial meet karong Pebrero.
Sa laing bahin, una nang mipadangat si Mayor Elizabeth Mandin-Pace ngadto kang Gobernador Aris Aumentado og suwat-hangyo ug ayuda gikan sa lalawigan alang Catigbian sa nahisgutan.
Sakop sa maong kalihukan ang 14 ka mga lungsod ug sa 16 ka mga distrito.
Niadtong Enero 24, mibisita ang mamamahandi sa Catigbian nga si Cresilda Rulida aron sa pagsubay sa maong ayudang pinansyal sa kantidad nga P800,000.
Giaprobahan kini ni Aumentado nga pagakuhaon gikan sa Special Education Fund (SEF).
Sa maong adlaw, gitunol ngadto kang Rulida ang tseke gikan kapitolyo.
Sagad gibisita sa gobernador ning buwan sa Enero gumikan sa ceremonial turn-over sa mga ayuda gikan sa kapitolyo.
Lakip niini ang P426,696 alang sa kapunungan sa Barangay Ambuan United Multi-purpose Cooperative ug ang duha ka pamilya nga nahatagan og panimalay ubos sa programa sa Gobernador nga Balay sa Paglaum uban ang Bohol Police Provincial Office pinaagi sa Libreng Alagad ug Balay.
Kini bisan pa kung sa nakalabay nga piniliay si Mandin dili kaalyadong politikanhon ni Aumentado.ALT/PIMO
