By PR | 03:41 PM January 16, 2024
Nagpahibalo ang Aboitiz sa dugang impormasyon kabahin sa pagdumala niini sa Bohol Panglao International Airport (BPIA) ug niadtong Enero 12, ang mga tinugyanan sa Air Asia nakighinabi kang Gob. Aris Aumentado sa kapitolyo bahin sa pagmugna niini og Air Asia hub sa BPIA.
Taliwala sa diskusyon kabahin niini, si Allenie Caccam, commercial head sa Air Asia Malaysia uban ni Diana Chua, Air Asia PH head marketing, naghisgot sa pag-abri og mga rota sa international destinations sama sa Thailand ug Vietnam samtang ginatan-aw usab nila ang posibilidad sa Taiwan, Hongkong ug Korea.
Nakasentro usab ang kukabildo sa posible nga pagdugang og mga rota gikan ug paingon sa Bohol sa mga tugpahanan sa Clark, Davao, Cagayan De Oro ug Kalibo, dili lang alang sa kargamento apil na ang mga pasahero.
Nagkanayon si Provincial Administrator Asteria Caberte nga ang Bohol daghan og ikatanyag sa maong mga potensyal nga merkado, ilabina karon nga ang lalawigan nailhan isip UNESCO GEOPARK.
Dugang ni Caberte, ang direksyon sa kapitolyo mao ang “Community Involvement Tourism”, hinungdan nga nag-amping ang administrasyon sa “positioning” bahin niini.
Gipadangat ni Daniel Torres, Network Planning Air Asia Malaysia, ang pangutana ngadto kang Aumentado kung unsa kaandam ang Bohol sa ilang tanyag nga Air Asia Hub, sa isyu bahin sa transportasyon ug peace and order, pinasikad sa ilang kalab-uton nga libuan ka mga “arrivals” matag adlaw sa umaabot nga hub.
Tubag ni Aumentado, kontrolado sa lalawigan ang seguridad sa katawhan sa ilang pagsulod dinhi, ang hinungdan nga ang Bohol naila isip ikaduha sa pinakamalinawon nga probinsya sa tibuok nasod ikaduha lang sa Davao. ( ALT/PIMO)
