By PR | 04:48 PM December 19, 2023
Duha ka panagatang de-komersyo (commercial fishing boats) nga kasamtangan gimaneho sa mga sakop sa people’s organizations (POs) ang gikatakda nga mudonggo sa Bohol adlaw’ng Martes Disyembre 19.
Ang duha ka 62-footer tuna handline nga mga panagatan naglawig gikan sa Subic niadtong Disyembre 17 gitimon sa mga sakop sa PO sa Panglao ug Guindulman.
Kini tungod sa paningkamot ni Gobernador Erico Aristotle Aumentado kinsa nihangyo sa mga tinugyanan sa Bureau of Fisheries and Aquatic Resources (BFAR) nga paluyohan ang mga PO sa gagmayng mananagat.
Tungod sa hangyo sa gobernador, gitugyan ang duha ka mga panagatan nga magamit sa pagpamasul og dagkung isda sama sa bariles (yellow fin tuna) nga mapalgan sa kadagatan sa Camiguin ug Siquijor ingon man sa pipila ka dapit sa Bohol.
Tinguha ni Aumentado nga matabangan ang gagmayng mananagat aron makahimo og mas daku nga produksyon samtang makatampo usab sa paningkamut nga mapaubos ang presyo sa isda sa lalawigan.
Ang duha ka 62-footer tuna handline nga mga panagatan multi-gear usab ug mahimong gamiton sa baby ring net (banogbanog) nga makakuha og tulingan, borotborot, tamarong ug kabalyas.
Madaug niini bisan 20 tonelada nga karga bisan pa man ang 20 ka mananagat nga mag-ulhos ulhos sa pagpanangat.
Tumong sa gobernador nga kahatagan ang mga gagmay’ng mananagat og higayon pag-organisar ug pagpanagat mga 15 ka kilometro gikan sa piliw aron makabaton sa mas daghang pakuha.
Sa tuig 2024, gilauman nga masangkapan usab ang ubang mga POs niini nga panagat ug, kon adunay mas dagko pa nga sama niini, mahimong maangkon pinaagi sa loan program sa pagamhanang probinsyal.
Nasayran nga gidasig sa kagamhanang probinsyal ang mga opisyales sa mga local government units (LGUs) nga tugutan ang mga mananagat pagpanagat sa mga hingtungdang municipal waters nga may gilay-on 10.1 ngadto sa 15 kilometros gikan sa piliw.
Sa gihimong tigum niadtong Septyembre 8, giklaro nga kini ubos sa mga kondisyones nga gilatid ug pinasikad usab sa ordinansa nga ipatuman sa tagsa-tagsa ka mga hingtungdang LGUs.
Kabahin kini sa mga lakang nga gipahiluna sa “Task Force Isda” ubos sa superbisyon ni Aumentado nga pangusgan ang mga paningkamot pagtubag sa problema bahin sa taas nga presyo sa isda.
Hinuon matod ni Alfeo Piloton, kanhi BFAR regional director ug karon consultant sa Office of the Provincial Agriculturist, nga ang muabot nga duha ka commercial fishing boats dili lang panagatan apan gamiton usab pagpangompra og isda sa Zamboanga, Dadiangas ug uban pang mga lugar nga makasuplay sa lalawigan og daghang isda nga presko ug barato.
Kini lakip sa pagpahibalo sa membro sa “Task Force Isda” atol sa gipahigayon nga Capitol Reports niadtong Disyembre 8.PIMO/ALT
