By PR | 10:54 AM December 15, 2023
Nagpahimangno ang Bohol Provincial Police Office (BPPO) sa katawhan nga magmainampingon atol sa kasaulogan sa Pasko batok sa mga malapason nga mopahimos sa higayon.
Matud pa ni Col. Lorenzo Batuan, hepe sa BPPO, nangandam ang kapulisan sa lalawigan sa posible nga pagsaka sa krimen sama sa kawat, pagpanglabni ug uban pang mga kalapasan tungod sa pagdagsa sa tawo sa mga dagkung tindahan ug mga simbahan sa Pasko ug Bag-ong Tuig.
Si Police Lt.Col. Joseph Berondo, hepe sa Operations Division sa BPPO, nagpahimangno sa katawhan nga kanunay magmabinantayon sa mga lugar nga daghan ang mga tawo nga magtapok aron malikay sa mga malapason.
Sa nakalabay’ng semana, gikataho nga dunay grupo sa mga kawatan gikan og Mindanao ang nadakpan sa kapolisan didto sa lungsod sa Jagna. Naalarma usab sa mga residente ang pagpanaka og mga kabalayan sa pipila ka mga barangay sa lungsod sa Loon ug Maribojoc ning ulahing mga adlaw.
Gitin-aw ni Berondo nga walay grupo sa mga tulisan gikan sa Mindanao ingon man walay mga kawatan gikan sa laing probinsiya ang nakasulod sa Bohol ning panahon sa kapaskuhan. Matud ni Berondo, mga taga-dinhi ra sab sa Bohol ang responsible sa maong mga pagpangawat.
Hinuon, gisundan na sa kapolisan ang mga nahitabong pagpanaka og mga balay didto sa mga nahisgutang lungsod.
Tungod kay dili kalikayang manuroy o motambong og mga tapok-tapok o party atol sa kasaulogon ning pantheon sa Pasko, giawhag ni Berondo ang publiko nga paniguradohon nga luwas ug nakakandado ang tagsa-tagsa ka mga pinuy-anan kon biyaan kini.
Dugang pa niya, seguradohon nga sirado ang puy-anan kon mogawas sa ilang panimalay kinahanglan biyaan apan, kung mahimo, dili maghurot og panglakaw.
Ang kapolisan sa lalawigan naka-full alert aron pagseguro nga mabantayan ang katawhan ning panahon sa Pasko ug Bag-ong Tuig, pasalig sa mga otoridad. (PIMO/AT)
