By PR | 06:29 PM December 11, 2023
Ang mga lungsod sa Tubigon ug Loboc maoy nigawas nga madaugon sa indigay sa Dayegon Chorale ug Rondalla nga gipahigayon sa kagamhanang probinsyal niadtong Disyembre 10 isip kabahin sa mga kalihukan sa kasaulogan sa Pasko.
Gipasiugdahan sa Center for Culture and Arts Development (CCAD), ang maong kalihokan nga gipahigayon sa Bohol Cultural Center diin kalain-laing mga local government units (LGUs) ang nagpagpakita sa ilang abilidad sa musika pinaagi sa chorale ug rondalla.
Misalmot sa maong Chorale Competition ang mga lungsod sa Tubigon, Garcia Hernandez, Tagbilaran, Dauis, Baclayon, ug Balilihan.
Sul-ob ang ilang mga filipiniana ug barong tagalog, mikanta ang mga partisipante go nagkalain-laing tradisyonal nga mga Filipino Christmas songs.
Ang partisipante gikan sa Tubigon maoy gideklarar nga grand champion sa chorale competition og nakuha ang kantidad nga P150,000 nga premyo sa unang ganti.
Nakuha sa Tagbilaran City ang P100,000 sa ikaduhang ganti, samtang ang Dauis maoy mipahiluna sa ikatulong ganti lakip na ang premyo nga P75,000.
Sa laing bahin, lima ka LGUs ang nagtigi sa kompetisyon sa rondalla nga gilangkoban sa Garcia Hernandez, Bilar, Loboc, Sikatuna, ug Calape.
Ang lungsod nga nabantog sa musika nga mao ang Loboc nagmalampuson nga nakakuha sa unang dapit sa kompetisyon sa rondalla ug gitangag nga premyong P150,000.
Ang kasikbit nga lungsod niini nga mao ang Bilar nakakuha sa ikaduhang ganti lakip ang P100,000 nga premyo samtang ang Garcia Hernandez maoy nagsunod sa ikatulo ug nakadawat sa P75,000.
Ang Kasadya Sa Bohol 2023 nagtinguha nga padayonon ang kasaulogan sa talagsaong kultura nga kabilin sa Bohol. Subay niini, ang kalihukan naghatud ug kalingawan sa mga Bol-anon ning panahon sa Pasko pinaagi sa pasundayag sa mga lokal nga talento pinaagi sa performing arts.
Ubos sa estratehikong roadmap sa Aumentado-Balite Administration, ang kagamhanang probinsiyal miila sa panginahanglan sa lokal nga mga tradisyon ug mapreserbar ang Bol-anong kabilin pinaagi sa nagkalain-laing programa sa kultura. (PIMO/GMC)
