By PIA Bohol | 10:37 AM November 10, 2023
Gibansay sa National Irrigation Administration Region 7 (NIA-7) ang ilang mga Institutional Development Officers (IDOs) aron sila na ang mahimong magtudlo sa ilang gitutokan nga kahugpungan nga naggunit sa communal irrigation systems sa mga pamaagi sa pagdumala ug pagmintinar niini nga mga pasilidad.
Didto sa NIA Region 7 Central Visayas Training Center, Tagbilaran City, Bohol, gipailawom sa Training of Trainers on Operations and Maintenance (O & M) of Communal Irrigation Systems (CIS) ug mga proseso sa Institutional Development gikan Nobyembre 6-10, 2023 ang mga IDOS, sanglit sila na ang tahasan sa NIA sa paggahum sa mga mag-uuma nga nahugpong aron mao nay modumala sa higayon ga itugyan na sa kagamhanan ang pagdumala sa mga CIS.
Subay sa Executive Order 138 s. of 2021, gilagdan nga itugyan gayud sa NIA ngadto sa mga local nga kagamhanan ang mga CIS subay sa devolution.
Nunot niini, ang programa sa Training of Trainers gidesinyo aron makakat-on ang mga Irrigators Development Officers sa ahensya ug makabaton sa kahibaw ug katakus sa pagbansay ug pagpanudlo sa mga tahasan unya sa LGUS, aron dili mopalyar ang hanoy na nga pagdumala ug pagpadagan sa mga patubig nga naa sa mga kumunidad.
Sa pagpa-ambit ni Leo G. Gallego isip resource person, gituki didto sa bansaybansay ang mga mahinungdanon nga ang-ang sa programa lakip na ang importante kayo nga mga tikanganan sa paghugpong ug pagpatapok sa mga benepisaryo ngadto sa us aka irrigators association (IAs).
Gihisgutan usab ditto ang nga batakan ug regular nga mga bansaybansay, ug mga kalihukan nga pagahimoon sa napundok nga mag-uuma alang sa ikatunhay sa pagdumala ug pagsinati sa patubig.
Mismo ang mga tinugyanan sa NIA Central Office System management division pinangulohan ni Engr. Wilhelm Tiangco ang mipatin-aw sa mga gikinahanglang kat-onan sa Operation ug Maintenance.
Kasamtangan usab ang NIA naghatag sa superbisyon, monitoring, ug paghatag og teknikal nga abag sa mga CIS nga itugyanay na ngadto sa LGUS subay sa lagda sa debolusyon.
Ug samtang ang NIA Region 7 nangandam alang niini, ang mga bansaybansay nga gitanyag karon maggahum sa mga mag-uuma nga makamao na modumala sa sa kasaligan nga sektor sa panguma, segun pa ni NIA 7 Regional manager Engr Rory Avance. (PIAbohol/NIA-7 IO)
