By PR | 08:55 PM October 24, 2023
Ihigayon ang pangagamhanan sa lalawigan ang usa ka youth environmental forum nga motuki sa katungdanan sa mga kabatan-onan sa pagkunhod sa epekto sa cimate crisis.
Ang kalihukan karong Nobyembre 18 pasiugdahan sa Bohol Provincial Environment Management Office sa ilang pagtambayayong kauban ang Provincial Youth Development Office, Office of the Governor ug ang Regenesis Project.
Ang “Bohol Youth Environmental Forum” tumong sa pagpalambo sa kaamgohan sa kalikupan sa mga Bol-anong kabatan-onan ug aron dasigon sila sa pagsalmot sa pagmugna og mga solusyon nga makatabang sa pagsulbad sa kasamtangang mga isyu sa ekolohiya sa nasud.
Lakip niini ang pagkonserbar sa mga natural nga kahinguhaan ug pagpagaan sa mga katalagman ug epekto niini sa mga komunidad tungod sa climate change.
Mga tinun-an gikan sa lain-laing mga kolehiyo ug unibersidad sa lalawigan ang gipaabot nga motambong sa tibuok adlaw nga kalihokan sa Ceremonial Hall sa Bag-ong Capitol Building.
Kini gidasunan usab sa geoconservation pinaagi sa Bohol Island UNESCO Global Geopark ug sa Bohol Regenerative Island nga proyekto sa kagamhanang probinsiyal. (PIMO/GMC)
